Mii fertet ain várrugasat
Beassáš- ja geassedoalut leat sirdojuvvon čakčii. Dál lea manname čavčča guvlui, ja olusat leat álgán ráhkkanit ja lágidit doaluid ja sosiála čoakkálmasaid. Dat mearkkaša dan ahte lea bahá ahte covid-19 njoammugoahtá fas viidát.
Norggas lea leavvagoahtán fas dat dávda. Olusat dáidet leat dolkan leat várrugassan. Vahkkoloahpaid leat feasttat ja dearvvašvuođa- ja fuollaministtar Bent Høie lea beahtahallan go olbmot lágidit feasttaid ja go beare olusat čoahkkanit. Dáinna lágiin oainnat leavvagoahtá fas covid-19.
Ii leat eará vuordit. Lea oainnat nu ahte Norgga leat rahpan eambbo ja eambbo. Beasat johtit iešguđetge riikkaide ja máŋggat olgoriikkalačča besset Norgii. Olgobáikkiid rahpe. Vuoktačuohppanbáikkiid rahpe. Skuvllaid ja olu eará fálaldagaid rahpe. Dál lei šaddan masá dego áibbas dábálaš dilli fas, ja nu álbmot ge ealligoahtá fas nu go dábálaččat.
Stuora moraš dáiddii ge sidjiide geat liikojit pubbain fitnat. Dál leat eiseválddit gidden vuollakrána dii 24. Olgobáikkit eai beasa šat doallat rabas. Lea váivi dan fitnodatjovkui go sii masset olu dietnasa. Seammás lea nu ahte go olbmot gárihuvvet, de eai beroš seamma olu movt eastadit njoammuma. Váivvimus dáinna lea diehttelasat ahte ruovttofeasttat lassánit ja dat ii daga buori njoammoeastadeapmái.
Go Sámis dál lágidišgohtet doaluid, de lea dehálaš čuovvut eiseválddiid rávvagiid. Konfirmašuvnnain galgá ovttas geas lea ovddasvástádus ahte olbmot nagodit ja sáhttet doallat mehtera gaskka. Nu lea dasto veadjetmeahttun beare olu gussiid diŋgot. 20 olbmo čáhket priváhta viesuide ja jus doalut leat almmolaš visttiin, de lea vejolaš bovdet 200 olbmo beare fal lea vejolaš doallat gaskkaid.
Ávvir sávvá buohkaide lihku doaluiguin erenoamáš áiggis. Mii ipmirdat ahte soaittát háliidan eambbo gussiid. Mii ipmirdat ahte soaittát háliidan spaggadievva Girkus konfirmerejuvvon.
Priváhta headjadoaluin Østlánddas gos covid-19 leavihii ja Hurtigruten, mii dagahii vivvihis njoammuma, leat buorit ovdamearkkat das mii sáhttá geavvat. Danne lea dehálaš muitit ahte báikkálaš leavvan maid sáhttá deaividit uhca sámi gilážiin. Jus leavvigoahtá muhtin doaluin Sámis, de lea dehálaš dieđihit dan, vai lea vejolaš bissehit njoammuma njoammuguorramiin.
Jus eat čuovu nuolggadusaid de lea várra ahte fas giddejit Norgga. Dan leat juo dahkan ovtta fylkkas; Siskkit Østfolddas. Dan mii eat hálit.
Priváhta headjadoaluin Østlánddas gos covid-19 leavihii ja Hurtigruten mii dagahii vivvihis njoammuma, leat buorit ovdamearkkat das mii sáhttá geavvat.