Váiban maŋŋel vuosttaš gilvvu
Guovdageainnu ovddeš skutercrossvuoddji Martin Haetta searvvai vuosttaš geardde motocrossgilvvuide, 11 jagi maŋŋel go heittii skuteriin gilvvohallamis.
Kárášjohkii ledje čoahkkanan vuoddjit miehtá Davvi-norgga ja sin gaskkas lei maid okta guovdageaidnulaš. Martin Haetta, gii ovdal lea gilvalan skutercrossas, searvvai vuosttaš geardde motocrossgilvvuide, lášmmohalliid luohkkái.
Haetta logai iežas hirbmosit váiban maŋŋel gilvvuid ja balai ahte sotnabeaivvi ii beasa eret seaŋggas go nu lea boatkuluvvan.
– Dál lean váiban ja rumaš lea bávččas. Nie lea go olmmoš ii leat hárjehallan ja galgá viggat mannat gilvalit. Mun in leat hárjánan dása, mojohallá Haetta go Ávvir deaivvada suinna maŋŋel finála vuodjima.
Losit go dálvet
Haetta lea ovdal gilvvohallan skuteriin ja son lea maid hárjehallan ollu mohtorvaláštallamiid ollu jagiid. Son muitala ahte dát motocrossvuodjin lea su mielas mihá losit go skutercrossa.
– Mu mielas lea stuora erohus dán guovtti suorggis. Geasset lea beali geahppasit vuoján mainna vuodjá ja leat ge guokte juvlla maid alde galgá bissut. Nu ahte lea losit vuodjit geasset, čilge Haetta ja lohpida ahte su gal beassat oaidnit eambbo vuodjime motocrossa.
Hálbbit go skuter
Haetta sávvá boahtteáiggis eambbo guovdageaidnulaččaid oaidnit gilvvuin go biras han lea sturron Guovdageainnus maid, nu go Kárášjogas ge lea. Maŋemus guovtti jagis leat ollu ođđa vuoddjit vuodjigoahtán motocrossvuodjimiid Guovdageainnus ja Haetta lea ge okta sis.
– Diibmá, go álgen hárjehallat, de ledjen 10-15 geardde hárjehallame. Dán geasi lean bargan olles geasi inge leat šaddan go oktii hárjehallat. Dál lei fas vejolašvuohta vuodjit ja bearjadaga de mearridinge ahte searvvan gilvvuide, mojohallá Martin Haetta.
Son muitala ahte dát valáštallan ii leat nu divrras go skutercrossa ja ahte vaikko geas lea vejolašvuohta searvat gilvvuide.
– Moaddelogi duhát ruvnno máksá oastit vuojána ja suodjalangárvvuid. Buori adnon vuojána sáhttá gávdnat gaskal 20 ja 30 000 ruvdnui ja de ferte vel unna kurssaža čađahit vai oažžu vuodjin lobi. Sávvamis boahtteáiggis servet eambbosat dákkár vuodjimiidda, loahpaha Haetta.