Nubbin maŋemuš oasseváldi dál njunnošis
1. Maid bargá go juoŋasta?
– Bivdá jieŋa alde sáimmain. Boret guokte ráiggi ja bidjat sáimmaid dohko, guolástit.
2. Mii lei dološ sámi girječálli Johan Turi vuosttaš girjji namma?
– Muitalus sámiid birra.
3. Mii lea Davvi Suoma stuorámus jávri?
– Ii bat dat leat Avvilis diet… na Ánarjávri.
Májjá vástida riekta buot golbma gažaldaga ja beassá liigegažaldagaid vástidit.
Isak Saba lei dovddus sápmelaš. Man guovtti ášši geažil lea son dovddus?
– Mun dieđán son lei juogalágan politihkkár. Vuosttaš sápmelaš gii beasai Stuorradiggái. Son han beasai Bargiidbellodaga ovddas Stuorradiggái, ja lei sátnejođiheaddji Unjárggas. Ja son han lea čállán sámi soga lávlaga.
Guđe sullos lea Davvenjárga?
– Máhkarávjjus.
Guđe golbma nissonipmila leat guovddážis sámi eamioskkus?
– Mun dat gal dieđán, mun lean bargan silbarávddis ja mis leat čiŋat dain. Go don jearat, de in muitte ovttage, measta logan Máttaráhkká. Sáráhkká, juksaáhkká ja uksaáhkká.
Guđe sámi media ásahuvvui 1946:s?
– Sihkkarit dii, a-a ii leat. Dat gal ferte leat NRK Sápmi, ii bat dat lean dat vuosttaš.√
Gii vuittii Sámi Grand Prix juoiganoasi 2019:s?
– Nils Peder A. Gaup, a-a dat gal lei lávlunoassi. Hans Ole Eira. A-a, Kim Hallgeir Berg.
Sámi nissonolmmoš searvvai 2015:s «The Voice» Tv-gilvui, mii dan namma lea?
– Hás dat lei Annbjørg Haetta. Mun dieđán dat Marianne lei maid mielde okte, mun dat ferte leat Annbjørg.
Mii lea Sámi nationálateáhtera namma Norggas?
– Dat gal lea Beaivváš Guovdageainnus. Beaivváš Sámi Našunálateáhter.
Boanni lea Sámi guhkimus johka. Guđe njárggas dat lea?
– In leat goasse gullan, Sáltoduoddaris várra. Mun ferten beare dadjat ahte mun in dieđe.
Juohke gilvaleaddji beassá vel geahččalit vástidit ovtta árvádusa. Rukses árvádus lea váddáseamos ja jus dan máhttá, de oažžu 15 čuoggá. Alit árvádusain oažžu 10 čuoggá ja ruoná árvádusain 5 čuoggá.
Jurddašanáigi: 1 minuhta.
Májjá vállje váddáseamos árvádusa.
Dávvet lei olgun vázzime go arvváskii. Sus ii lean arvesuodji iige oaivesuodji. Sus njuske buot biktasat, muhto ii oktage vuokta su oaivvis njuoskan. Mo nu sáhttá?
– Sihkkarit njuikii johkii dahje juoidá, ha-ha. Vuorddes dál. Dál mun gal dieđán, sus lea báljesoaivvi, bohkosa Májjá.
Čuoggá oktiibuot: 25
– Goas dát boahtá aviisii? Dát gal lei hui somá!
– Dát gal lei hui somá. Diet Isak Saba, mun lean dán geasi vel vuodján meattá ja mii bisáneimmet vel doppe su muitobáikkis, mearragáttis gos son orui.
Juohke gilvaleaddji beassá hástalit ođđa gilvaleaddji searvat Ávvira geassegilvui.
– Gii dal duosttašii searvat? Mun hástalan iežan oambeali, a-a, son gal lea nu čeahppi. Máret Iŋggá mun hástalan!