Gevrii ruvkevuostálastiid olgoráigge
Badjeolbmot, birasgáhttejeaddjit ja báikkiolbmot gevrehallojedje olggos Nussir ASA preassačoahkkimis. – Boahtte háve go deaivvadit, de ii leat dan lanjas, muhto riektesálas, celkkii Fiettar orohaga ovdaolmmoš Nils Utsi.
Badjeolbmot, birasgáhttejeaddjit ja báikkiolbmot gevrehallojedje olggos Nussir ASA preassačoahkkimis. – Boahtte háve go deaivvadit, de ii leat dan lanjas, muhto riektesálas, celkkii Fiettar orohaga ovdaolmmoš Nils Utsi.
Nussir ASA lei bovden muhtin Finnmárkku mediaid preassadeaivvadeapmái muitalit ahte dál lea fargga visot ortnegis álggahit Nussir ruvkedoaimma. Nussir direktevra Øystein Rushfeldt lei hirbmat rámis go viimmat, maŋŋel logi jagi bargama, orru gávdnan čovdosa.
– Mis lea dál ovttasbargu Duiskka fitnodagain Aurubis Ag:in. Sii áigot mis oastit veaikki, ja go mis lea dát šiehtadus, de dat mearkkaša ahte fáhkka lea mis stuora vejolašvuohta eambbo ruhtadangálduid fidnet. Lea dego jus viesu áiggut hukset. Jus manat báŋkui ja čájehat ahte dus lea logi jagi láigoheaddješiehtadus, de lea álkit oažžut loana. Lean oba mihá henneha duhtavaš dál, jus sáhttá nu lohkat, mojohalai Rushfeldt.
– Ovdalaš juovllaid oaččuimet maid lobi álggahit ruvkedoaimmaid, ja dál lea bargu olles leahtuin jođus oččodit loahpparuhtadeami. Dál, go Aurubis lea mielde, de dat addá olu vejolašvuođaid. Aurubis lea buot deháleamos šiehtadus mii dássážii lea dahkkon, lohká Rushfeldt.
Boahtán gitta Hamburgas
Máilmmi nubbin stuorámus veaikefitnodat, Aurubis AG, lei boahtán gitta Hamburgas Skáidái muitalit sámi ja Finnmárkku mediaide ahte sii ostet dan mađe veaikki Nussiris ahte Nussir fargga beassá álggahit ruvkedoaimma.
Aurubisa čilgehus iežaset doaimmain ii šaddan nu go plánejuvvon. Dreassagárvoduvvon dievdduid searvái Skáiddi hotealla čoahkkinlatnjii iđistedje maid badjeolbmot, Natur og Ungdom ovddasteaddji ja eará báikkálaš berošteaddjit. «Gruveslam er Norges skam!» plakáhtain čuččodeigga nuorra nieiddaguovttes jur Øysten Rushfeldt buohta, dan botta go Rushfeldt rámidii iežaset barggu.
– Dát ii leat almmolaš álbmotčoahkkin, eaige deike beasa go bovdejuvvon olbmot. Dii oažžubehtet moadde sáni ja de bivddán mun din guođđit čoahkkima. Čoahkkin lea mediaid várás, dajai Rushfeldt gussiide geat eai lean bovdejuvvon.
– Mun lean vuolgán deike muitalit movt dii billistehpet min luonddu ja dan galget investorat diehtit. Dás ii leat sáhka dušše luonddus, muhto min eallimis. Jus ruvke álggahuvvo, de boazodoallu nohká. Mun gulan don leat «henneha duhtavaš» go dál láhkonišgoahtá ruvkedoaibma. Mun in leat seamma duhtavaš ja boahtte háve go deaivvadit, de dat šaddá riektesálas, iige dákkár čoahkkimis, dieđihii Fiettar orohaga ovdaolmmoš, Nils Utsi.
– Mun dieđán dii billistehpet vuona. Vuotna lea ovdal ge billistuvvon ja mun lea háleštan ovttain guolásteddjiin gii 70-logus ii diehtán eará go fárret eret go ruvkedoaibma billistii vuona. Dál dahkabehtet dan vuot, dieđihasttiiga Natur og Ungdom nuorat.
Maiddái nuorra boazosápmelaš čilgii váikkuhusaid. Son čilgii eaŋgalasgillii vai investorat ge ipmirdit.
10 miljárdda ruvnnu árvosaš šiehtadus
Maŋŋel go guossit, geat eai lean bovdejuvvon, guđđe čoahkkima, de jotkkii preassakonferánsa. Nussir ASA lea logi jagi bargain ollašuhttit ruvke-niegu Riehpevutnii. Preassačoahkkima oktavuođas Nussir ASA ja Aurubis AG šiehtadus vuolláičállojuvvui.
– Lea stuora dáhpáhus. Aurubis AG oastá visot veaikki man Nussir buvttada dan logi vuosttaš jagi. Jus veaikehaddi bissu nu go dál, de lea šiehtadusa árvu 10 miljárdda ruvnnu. Dat haddi lea dieđusge veaikehatti ektui, čilgeba Rushfeldt ja Aurubis AG ovddasteaddji Nickolas Albrecht.
Nussir ASA ii loga diehtit ahte Fiettar lea plánen stevdnet ášši diggái. Nussir iige dieđe ahte Sámediggi juolluda ruđa dan vejolaš diggeáššái.
– In leat gullan maidege dan birra ja oaivvildan ahte Sámediggi baicce galggašii geavahit ruđa servodatáššiide iige diggegoluide. Inge mun oainne ahte šaddá sáhka ekspropieremis, lohká Rushfeldt.
Aurubis AG ovddasteaddji Nickolas Albrecht lohká iežas diehtán dan vuostehágu birra mii Riehpovuonas lea. Dattetge sus lea ollislaš luohttevašvuohta das ahte bealit gulahallet ja šaddet ovttaoaivilii.
– Lea dábálaš ahte lea vuosteháhku go lea sáhka stuora prošeavttain. Min bealis álo ávžžuhit ja rávvet ahte bealit galget soahpat ja gávdnat čovdosiid. In leat háleštan gal boazodolliiguin, muhto lea vejolaš ahte ságastan singuin, lohká Albrecht. Aurubis AG ii loga investoran, muhto gávppašeaddjin.
Go badjeolbmot, birasgáhttejeaddjit ja báikkiolbmot iđistedje Nussira preassakonferánsii, de Nussir ASA jođiheaddji Øystein Rushfeldt bivddii sin guođđit čoahkkima masa eai lean bovden go moadde media ja eará mearkkašahtti olbmuid.