In lassána bálká ...
giid bálkkáide.
Son lea ieš buohccindieđihuvvon go Ávvir finada su guossis, ja čilge ahte dat lea heajos HMS dihte. Ii dušše su fitnodagas, muhto buot silbarávddiin.
– Doaktárat leat guorahallame mu geahppáid. Lea čielggas go bargá mirkkogássain beaivválaččat nu guhká go mun lean bargan, de dat sáhttá čuohcat dearvvasvuhtii, dadjá son.
– Mun háliidan maid olles váimmuin sávvat ahte mu bargoustibat Guovdageainnus ja maid eará báikkiin Norggas ožžot buoret bálkká dáin šiehtadallamiin ja ahte buot bargit ožžot dan bálkká masa sis lea gáibádus. Mun sávan sii ožžot albma bálkká!, dajai Alwin ovdal ovttaoaivilvuođa šiehtadallamiin.
Ain agoartabálká
Juhls Silvergallery beaivválaš jođiheaddji Sunniva Juhls muitala ahte sis lea ain agoartabálká, muhto ii loga ipmirdit manne Alwin kritisere sin.
– Alwin barggai dáppe 30 jagi áigi ja ovdal mu áiggi. 30 jagis lea ollu rievdan ja min fitnodat lea dál 61 jagi jo leamaš. Lea nu ollu rievdan ahte diŋggaid maid mii barggaimet 10 ja 20 jagi áigi eat bargga šat dál. Mii čuovvut dábálaš tariffabálkká ja mis leat maid báikkálaš bálkášiehtadallamat jahkásaččat. Mii leat maid álo šaddan ovttaoaivilii šiehtadallamiin. Mun lean hui ilus go mis leat dan mađe ollu fágaorganiserejuvvon bargit go mis leat ja mus gal ii leat makkár ge beroštupmi máksit olbmuide unnit go dan masa sis lea gáibádus. Mun háliidan buotlágan bálkášiehtadallamiid, go mun lean sosiálademokráhta oaivvebadjel, dadjá Juhls.
Son muitala maid ahte go ođđa bargit bohtet ja álget bargui, de ii leat sis agoartabálká, muhto diibmobálká vuosttaš mánuid.
– Bargit eai galgga dárbbahit rahčat agoarttain go eai dovdda báji. Sii galget beassat geavahit dan áiggi maid sii dárbbahit álggos, dadjá son, ja muitala ahte sin bargit eai háliidivčče streiket ja sii sávvet ahte šaddá ovttaoaivilvuohta šiehtadallamiin.
Beare hálbi
Juhls lea ovttaoaivilis Alwiniin dan ektui ahte gálvvut ja buktagat maid sii vuvdet leat beare hálbbit.
– In dieđe gal čuohcá go dušše bargiide, muhto maid álbmoga duodjeipmárdussii. Duodji, leaš dal dipma, garra, láse, keramihkka, silba dahje mii lea beare hálbi. Ja dáppe lea mihá hálbbit go lulde go mii leat ovttaládje bilidan iežamet kundariid hálbbes buktagiiguin.
Son dattetge ii oaivvil ahte lea gilvvu dihte beare hálbi:
– Mu mielas ii leat mis hatti ektui gilvu, muhto baicca ođasmahttit buktagiid. Mis buohkain lea iežamet stiila, Singeris lea iežas, Peteris ja Anitas lea iežaska, Alwinis iežas ja nu ain. Mis buohkain lea iežamet stiila ja identitehta, ja nu šaddá ge álbmogii valljivuohta ja besset válljet masa liikojit, dadjá Sunniva Juhls.
– Heittot mu áiggi
Alwin lea duhtavaš go šiehtadallamat manne nu go manne ja golle- ja silbarávddit oažžugohtet buoret bálkká. Son gullá maid Juhls lea vástidan ja čilge ahte su áiggi ii lean buorre agoartabálká.
– Jus dál lea bálká tariffa vuođul, de gal mearkkaša ahte sis lea buoret bálká ja ahte Juhls lea buorre fitnodat. Ja jus bargit dál vel oažžugohtet buoret bálkká, de gal lea dat buorre ođas ja mun sávan ahte fitnodahkii ii šatta losit dan dihte, dadjá Alwin. Son lasiha ahte lea hirbmat buorre go šiehtadallamiin manai nu go manai ja ahte bálká buorrána.