Árvvoštallá vuolgit gilvaleaddjin Muotkai presideantagilvvus
Bjørn Thomas Åhrén lea ain árvvoštallame vuolgá go NSR presideantaevttohasa vuosteevttohassan. Árvvoštallama oktavuođas son dattetge searvvai ovttas presideantaevttohasain Silje Karine Muotkain, digaštallat politihkalaš áigumušaid birra.
Mannan vuossárgga leaba Sámedikke presideantaevttohas Silje Karine Muotka ja Bjørn Thomas Åhrén digaštallan sierra debáhtas Norgga Sámiid Riikkasearvvi báikkálašservviid siskkáldas čoahkkimis.
– Báikkálaš searvvit háliidedje eanet diehtit munno politihkalaš áigumušaid birra, dadjá Åhrén Ávvirii.
Válggat
Jagi geahčen, jagi 2021, lea sámediggeválga ja dálá presideanta Aili Keskitalo lea cealkán son ii searvva NSR presideantaevttohassan. Norgga Sámiid Riikkasearvvi (NSR) báikkálaš searvvit leat kandidáhtta evttohusain bargamin.
Vuosteevttohas
Lulli-sámi válgabiire miellahtut dáhtto de digitálačoahkkima gos besset oahpásmuvvat Muotka Ja Åhréna politihkalaš áigumušaide. Duogáš lea go Mjøsan Dajve Saemien Siebrie leat jearran Thomas Åhréna sámedikki presideantaevttohassan vuolgit.
– Mun lean ožžon smiehttanáiggi vuolggán go presideantaevttohassan. In leat vel árvvoštallan, muhto ferten hui fargga cealkámuša buktit, dadjá Åhrén Ávvirii.
Čiegus dieđuin
Debáhtta sáhttá dattetge čujuhit dan guvlui ahte Åhrén vuolgá evttohassan. Ieš ii mieđit iige šiitte dan go Ávvir jearrá.
– Justa dál lea Silje Karine Muotka áidna presideantaevttohas. Boahtte vahkkus mii oaidnit mo ášši lea, dadjá Åhrén.
Ii diehtán
Åhrén muitala son ii diehtán debáhta birra ovddalgihtii. Son čilge dán bođii diehtit go soames journalista suinna válddii oktavuođa ja jearai dan birra.
- Ledjen dieđihan ahte searvvan čoahkkimii maid mun jáhkken leat dábálaš čoahkkimin. In diehtán debáhtas maidege, muhto serven dasa go vuos ledjen searvamin čoahkkimii, dadjá Åhrén.
Son čilge ahte fáhkka diehtu ii dahkan maidege.
– Vástidit gažaldagaid ja searvat debáhtaide fáhkka lea oassi politihkalaš barggus, dadjá Åhrén.
Loga maid ášši: Árvvoštallo buoremus NSR sámediggepresideantaevttohassan
Váilu formálalaš cealkámuš
Áigemearri ovddidit evttohasaid riikkastivrii lea golggotmánu 15. beaivi , dan maŋŋá meannuda riikkastivra ášši. Åhrén lohká son dáid beivviid buktá cealkámuša. Mannan vahkus čálii Sagat vuosttažin ahte Thomas Åhrén árvvoštallá vuolgit presideantavuosteevttohassan. NSR stivrrajođiheaddji Runas Myrnes Balto lohka Ávvirii sii eai leat ožžon Åhrén evttohusa sisa, muhto lohká gullan ahte sáhttá boahtet vuosteevttohas.
Giella rukseslisttus
Mjøsan Dajve Saemien Siebrie searvvi jođiheaddji Rita Helmi Laakso muitala sii atnet Åhréna buorren kandidáhttan.
– Son lea politihkalaččat čeahppi, nana buorre áddejupmi Lulli-sámi áššiide ja muđui. Min giella lea rukseslisttus. NSR lea čeahppi leamaš čalmmustahttit dan, muhto dát livčče buoret vel boahtet oidnosii jus Åhrén vuolgá evttohassan ja šaddá presideantan, dadjá Laakso.
Dárbu
Laakso lohká sii leat addán Åhrénii smiehttanáiggi dassái formálalaš cealkámuš galgá sisa.
– Golggotmánu 15. beaivvi diehtit mii goappá mii doarjut. Jus Åhrén ii vuolgge, de mii doarjut ollislaččat Muotka, dadjá Laakso.
Muotka gearggus
Silje Karine Muotka lea miehtan vuolgit presideantaevttohassan Álttá Sámiid searvvi jahkečoahkkima oktavuođas. Silje Karine Muotka lohká jus boahtá formálalaččat vuosteevttohas de dat ii váikkut su mearrádussii, ja lohká politihkka lea demokráhtalaš.
– Dalle go Aili válljejuvvui lei Ragnhild Nystad vuosteevttohas. Go Stein Roald Nystø válljejuvvui de lei Máret Guhttor vuosteevttohas. Dát čájeha dán olbmos lea maid miella searvat, dadjá Muotka.
Son joatká muitaleames ahte dát ii maid váikkut su politihkalaš áigumušaide ja boahtá ain ovddidit ja bargat iežas váibmoáššiiguin.