Koronalogut lassánit Lujávrri suohkanis
Borgemánu rájes registrerejuvvon koronalogut leat lassánan measta duppalit Lujávrri suohkanis Murmánskka fylkkas Ruošša beale. Dát boahtá ovdan virggálaš dieđuin maid almmuhit regionála eisseválddit.
Lujávrri suohkanis ledje registreren 65 olbmos koranadávdda čakčamánu 14. beaivvi rádjái. Dat lea measta duppalit eanet go mánu dassái.
– Ná olu go, imaštallá lujávrilaš Vladimir Chuprov.
Borgemánu 14. beaivvi, Lovozerskaja pravda suohkanaviisa lea čállán oanehaččat ahte Lujávrri suohkanis leat registreren 35 koronadávdda njoammuma oktiibuot.
Eisseválddit almmuhit koronadávdda loguid beaivválaččat iežaset virggálaš diehtojuohkin kanálaid bokte. Dan beaivvi go Ávvir čállá ášši Murmánskka fylkka eisseválddit leat registreren 13 695 koronadávdda dáhpáhusa oktiibuot buot fylkka suohkaniin.
Unnán luohttámuš
Vladimir Chuprov jođiha lujávrilaččaid stuorimus joavkku man miellahttun leat 4766 olbmo «Vkontake» nammasaš sosiála medias. Chuprov lohká muitit bures go beaggigođii Lujávrris ahte soapmásis lea koronadávda duođaštuvvon.
– Mun muittán go dat olmmoš šattai sihke iežas profiillas almmuhit čilgehusa, dasto min jovkui lea almmuhan čállosa mas šattai čilget buohkaide ahte sus manná bures ja ii lean duođaštuvvon koronadávda, muitala Chuprov.
– Oainnát olbmot eai diehtán mo reageret go dilli lea leamaš áibbas ođas ja amas. Dasto ieža eisseválddit eai almmut olu čilgehusaid. Orru leamen ahte dát dušše plussejit loguid vaikko iskkus ii soaitte duođaštan koronadávdda olbmos. Logihka mielde galggaše fas sihkkut dan ovtta ja čállit fas nolla, muhto dát eai daga dan. Nu ahte dávjá olmmoš báhcá jurdilit leat go jur dát logut duođat vai eai, navdá Vladimir Chuprov.
Vedomosti.ru aviissa mielde lea unnán luohttámuš virggálaš dieđuide koronadávdda birra dábálaš olbmuid gaskkas.
– Cuoŋománus leat 59% álbmogis luohttán virggálaš dieđuide, dasto loahpageahčen geassemánu 46-47% álbmogis lea leamaš luohttámuš virggálaš dieđuide koronadávdda statistihkalaš loguid birra Ruoššas.
Oahpaheddjiid iskosat váikkuhan loguide
Regionála eisseválddit ja suohkanbargit eai viša beare dávjá čilget koronadávdda loguid regiovnnas.
Dábálaččat sii almmuhit čilgetkeahtes loguid. Muhto čakčamánu vuosttaš vahkus leat virggálaš preassadieđáhusasteaset čállán ná:
– Otná koronadávdaloguid lassáneapmi Murmánskka oblastas lea obalohkái čadnon dasa go buot oahpaheaddjiin ledje váldon koronaiskosat ovdal skuvlajahki álgá. Oktiibuot 4936 oahpaheaddjis leat váldán koronaiskosiid. 18 oahpaheaddjis duođaštuvvui koronadávda, čállet preassadieđáhusas regionála eisseválddit.
Skuvlajahki Ruošša bealde álgá árbevirolaččat čakčamánu 1. beaivvi. Lujávrri suohkanis lassánii koronalohku eanemusat borgemánu 29. beaivvi – ovcciin olbmuin, ja dasto borgemánu 27. beaivvi – guđain olbmuin. Virggálaš dieđuin ii boađe ovdan leat go Lujávrris vai ránnjábáikkis Revddas gávdnan koronadávdda, muhto Lujávrri suohkanis.
Olbmot dolkan
Vladimir Chuprov oaivvilda olbmot eai šat hálit gullat koronaságaid. Muhto dovddasta ahte oba guhká koronadávdda ságat leat leamaš áigeguovdilis fáddán lujávrilaččaid joavkkus man son jođiha VK sosiála medias.
– Dat lei dieđus álggos, go dát lei ođas ja amas buohkaide. Muhtumat leat jurddašan ja ain jurddašit ahte dát ii leat duohta ášši oba ge, dego «fake news» dahje behtolaš ođđasat. Muhtumat leat váldán ášši duođalažžan ja čuvvon buot rávvagiid. Muhto áiggi mielde olbmot leat obalohkái dolkan ja váiban. Erenoamážit nu gohčoduvvon eastadandoaimmaid dihte olbmot leat dolkan go dát leat váikkuhan olu dábálaš eallimii ja dábiide mat olbmuin leat leamaš ovdal koronaáiggi, dadjá Chuprov.
– Dát ge maid váikkuhit dasa ahte olmmoš ii oba ge hálit šat gullat ja oaidnit makkár ge loguid, loahpaha Vladimir Chuprov.