Dán njiŋŋelasas NAVDET MEARKKA RIEVDADAN
Sis-finnmárkku diggegoddái ráhkkanahttime roavva boazosuola ášši
Boazobargi Lasse Andre Anti (32) muitala rahpasit iežas vásáhusa mearkarievdadeami ja suoládeami birra maid lea váidán politiijaide.
Lasse Andre Anti lea iežas barttas Skadjajávrris, Idjavuonduoddaris, go Ávvir riŋge sutnje. Son ja su siidda olbmot leat aitto ládje geargan gárddástallame. Ášši mas guovttes leat dál áššáskuhtton rievdadan bealjemearkka su bohccos álgá golbma jagi dás ovdal.
Jahki lea ge 2017, ja Anti lea ieš siviilasuodjalanbálvalusas, go su vilbealli gávnnai sus njiŋŋálasa mas lei bulžon biellu, ja seammás sáddii Lasse Andre Antii gova sutnje jearran dihte maid galgá bargat.
– Mun dáhtton su váldit eret biellobátti vai boazu ii biidnahuva, muitala Anti.
Go Anti bođii siviilasuodjalanbálvalusas de álge čohkket ealu, lei áigi geasseorohaga guvlui johttát. Antis lei muittus boazu mas vilbealli gálggai eret biellobátti.
– Mii álggiimet čohkket ealu, ja in mun gal oaidnán dan bohcco mas gálggaimet biellu eret, muitala Lasse Andre ja lasiha:
– In mun jurddašan dan birra šat maide, ja doivon dat gal sáhttá mannan nuppi siidii.
– Mun vurden bohcco
Čakča bođii, ja lei áigi álgit gárddástallat.
– Dan stuorit gárddis oidnen mihtilmas bohcco. Boazu sulastahtii mu njiŋŋelasa mas vilbealli válddi biellu eret, ja de jurddašan dál gal lea boahtán ellui. Go bođii girdnui, de oidnen ahte ii lean mu mearkkas. In vávján maide dalle, dadjá Lasse Andre Anti.
Gárddastallamat nohke, ja Anti ii lean oaidnán iežas njiŋŋelasa.
– Mun suoli vurden dan bohcco, go doivon dat lea ealus, dadjá son.
Lasse Andre Anti ii lean jietnadan oktiige vuos maide, muhto son geahčadii gova maid vilbealis lei ožžon dálvet.
– Siekŋanjunat njiŋŋelas lea hui mihtilmas boazu, ja dat sulastahtii dan maid oidnen gárddis čakčat, oaivvilda Lasse Andre.
Lasse Andre muitala ahte son jurdilii ahte áigu njávkat beljiid go rátket ealu skábman.
2018 čakča
2018 čavčča bođii boazu maid Lasse Andre Anti navdá leat iežas boazun gárdái.
– Mii álggiimet gárddástallat, gilkorasttiimet misiid ja álggiimet buohtastahttit miessenummariid. Buohtastahttimis dadjen mun ahte álddu miessi gullá munnje, ja áššáskuhtton almmái dajai ges ahte miessi gullá su bárdnái, muitala Lasse Andre Anti ja lasiha:
– Mun caggen ja gáibidin beassat njávkat bohcco beljiid. Dasto son bonjai bohcco vuollai, ja buohtastahtii álddu govain maid Lasse Andre vilbealli govvii 2017 dálvvi.
– Áldu lei juste seammalágan olggosoaidnit go dan govas maid vilbealli govvii 2017 dálvvi, nuvt mun válljejin geassit bohcco sierra latnji, dadjá Lasse Andre Anti .
Son muitala ahte áššáskuhtton almmái čuoččuhii ahte lei su bártni boazu, muhto Lasse Andre ii doahttalan dan.
Álddu miessi bođii girdnui maŋemus vuorus, ja Lasse Andre Anti muitala ahte son gesii miesi maid sierra latnji gos áldu lei.
Fákten bohccuid
– Álddu ja miesi vedden lanjas dassái go politiijat bohte, mus ledje olu veahkit geat bibme bohccuid ja čohkkájedje vuoruid mielde fáktema dihtii bohccuid vai eai galgan beassat saboteret, muitala Anti.
Politiijat bohte beaivvi maŋŋel, ja álge iskat ášši.
– Mii leimmet bures váiban go politiijat oktan mearkalávdegottiin bohte golbma beaivvi maŋŋel, lohká Anti.
Go mearkadovdit duođaštedje ahte lea sáhka rievdaduvvon mearkka birra, de godde bohcco.
– Miesi šattaimet luoitit, ja dan rájes eat leat šat oaidnán dan miesi. Nuvt rievtti mielde lean massán guokte bohcco, muitala Lasse Andre Anti.
Politiijat hilgo ášši
Lasse Andre Anti muitala ahte gárdde luhtte lei losses miella dalle go dat dáhpáhuvai.
– Ii hal dakkár ášši leat beare somá, dieđusge čuohcá millii, dadjá son.
Lasse Andre Anti váiddii ášši, muhto politiijat hilgo ášši. Lasse Andre ii vuollánan, ja son váiddii fas.
– Guokte jagi golihii ovdal go politiijat válde ášši duođalažžan, dadjá Anti.
Dal leaba dievdduguovttos áššáskuhtton váldán eará olbmo opmodaga, dainna áigumušain ahte atnit dan alcceska ávkin dahje earáide vuovdit dahje eará láhkai atnit dan iežaska oapmin.
Suoládeami atnet roavisin go deattuhuvvo ahte lea sáhka mearkkašahtti árvvus.
Lossat
Lasse Andre mielas lei álggus hui lossat ášši oktavuođas, muhto dál lea eanaš duhtavaš go eiseválddit leat váldán ášši duođalaččaid.
– Mun válljen leat rabas dainna áššiin go mus ii leat mihkke ge čiegadit. Mus dajai okta olmmái ahte seamma lea go ovtta dahje čuođi bohcco suoládan, muhto suoládan dat aŋkke lea, ja dat ii leat lohpi, loahpaha Lasse Andre Anti.
Advokáhtta
Ávvir váldá oktavuođa áššáskuhtton dievdduid advokáhtain, Hans Arne Nysaeter, Hegg og Co advokáhtafitnodagas, ja son ii hálit kommenteret ášši.
Ávvir lea maid geahččalan disdaga, čakčamánu 15. beaivvi, rájes oažžut politiijain kommentára áššái, muhto bearjadaga rádjái eai leat astan maide dadjat dan birra ahte manne álggos hilgo ášši ja manne leat ádjánan guokte jagi dutkat ášši ovdal leat áššáskuhtton dievddu guoktá geaid navdet rievdadan njiŋŋelasa.