– LOSIT JA EANET DRAMÁHTALAŠ go dat maid ovdal lean almmuhan
– Lávlla lea losit ja eanet dramáhtalaš go dat maid mun ovdal lean ráhkadan, lohká Sunna Utsi. Bearjadaga almmuha son ođđa singela. 25-jahkásaš Guovdageainnu nieida lávlu dan birra go oktavuođat boatkanit.
Lávlaga namma lea «Láhppán iežan» ja dat lea dan guorosvuođa birra maid olmmoš dovdá go heaitala irggiin dahje morsiin ja loahpaha oktavuođa mii ii soaitte nu buorre dahje dearvvašlaš leamašan.
– Olmmoš ipmirda ahte dat lei gal buoremus. Muhto, seammás ii hálit olmmoš ahte nubbi galggašii nu geahppasit dan váldit ge, čilge Sunna Ávvirii.
Earret popkarrieara lea son maid studeanta dál.
– Mihttun livččii eallit musihkain dahje goit ahte musihkka galggašii vel stuorát oassin mu eallimis ja almmuhit eambbo musihkaid, lohká son.
Čállá ieš
– Mu bealis ii leat lávlla juoga man birra maid ieš vásihan, muhto olmmoš han sáhttá dovdat dan dili go ferte gáidadit iežas eret negatiiva olmmáivuođain. Lávlla sáhttá leat sihke olmmáivuođa ja ráhkisvuođaoktavuođaid birra, mo ain dan dulko, čilge son áŋgirit lávlaga birra mii almmuhuvvo Spotifyas ja eará musihkkabáikkiin dán vahkku.
Sunna lea ieš čállán teavstta ja bidjan musihka lávlagii. Helge Moen lea buvttadeaddjin leamašan.
– Ođđa singela sáhttá várra govvidit lossadin ja dramáhtalažžan. Lávlla han lea hearkivuođa birra. Sihke mun ja Helge letne hui duđavaččat dainna. Mun dovddan ahte buvttadeamis vuhtto bures dat miellaláhki maid teaksta govvida. Eará sániiguin hui olu earálágan go dat eará lávlagat maid lean ovdal almmuhan. Dat várra leat eanet «upbeat» lávlagat mat darvánit millii, lohká Sunna.
11 jagi leamašan artista
– In hálit nu olu eambbo dadjat lávlaga birra, muhto oanehaččat sáhtán dadjat ahte dat lea dan birra ahte olmmoš vállje dahkat nu mo dahká iežas dihte, čilge 25-jahkásaš.
– In lean go 10-jahkásaš vuosttaš geardde go čužžon lávdde alde. Dan rájes lean lávlon olu lávddiid alde. 13-jahkásažžan debuterejin lávllačállin ja komponistan Kauto Live doaluin 2009:s, muitala Sunna Utsi.
Dan rájes lea son almmuhan singela ja almmuhan lávlagiid go lea searvan Sámi Grand Prixii sihke 2014:s, 2017:s ja 2019:s. Bajimussii
bođii 2017:s go šattai njealjádin lávlagiin «Mu gorut». Jagi maŋŋel lei mielde musihkkagilvvus NRK Urbi ja juogadii nuppi saji eará artisttain ja beasaige de 2018 geasi lávlut Riddu Riđđu festiválas.
Lávlaga «Láhppán iežan» čálii son 2019:s.
– Mis lei hui suohtas studios go barggaimet dáinna lávlagiin, ja lean hui duđavaš bohtosiin, nu ahte mun illudan gullat maid earát oaivvildit dan birra, lohká Sunna.
Eksperimentere idéaiguin
Borgemánus lea son mielde «Gigant» nammasaš doaluin.
– Dat lea jahkásaš nuoraidprošeakta maid Álttá suohkana nuoraidviessu «Huset» hoide. Ulbmil prošeavttain lea fállat oahppoarena nuorra artisttaide geat háliidit eambbo oahppat musihkkasuorggi birra ja gos besset vásihit mo lea leahkit artista, čilge Sunna.
– Artisttat geat ledje dás mielde ožžo buohkat sin iežaset buvttadeaddji ja besse golbma beaivvi studios bargat lávlagiin ja dan báddet. Mus lei juo gárvves čállon ja komponerejuvvon lávlla, ja ovttas buvttadeddjiin Helge Moeniin eksperimenteriime idéaiguin, báddiime vokála ja Helge de buvttadii lávlaga gárvvisin, muitala Sunna vel.