– Dušše lihkku ahte ii šaddan olmmošgoddin
Áššáskuhttineiseváldi oaivvilda áššáskuhtton almmái «ákšoáššis» galgá dubmejuvvot 5 jagi ja 8 mánu giddagassii go lea roavvásit roasmmehuhttán nuppi olbmo.
Ođđajagimánu 28. beaivvi lei «ákšoášši» goalmmát ja maŋimuš beaivi Hålogalándda lágamánnerievttis Romssas. Dat maid lágamánnerievttis meannudit dáhpáhuvai Anárjoga guovllus, Kárášjoga gielddas, borgemánu 31. beaivvi 2018:s. Áššáskuhtton dievdu galgá leat dearpalan gillájeaddji oaivvi máŋgii ákšuin, nu ahte gillájeaddji jámálgii. Sus ledje golbma hávi oaivvis dasa lassin go oaiveskálžu luoddanii. Gillájeaddji oaivvis šadde goarrut gaskal 25 ja 30 sákkaldaga, dasa lassin go su oaivái šadde bidjat vihtta metállabihtá. Áššáskuhtton almmái čuoččuhii dikkis ahte son lea heakkaheađis iežas várjalan.
Vihtta jagi ja gávcci mánu
Áktor Karoline Gjønnes Johansen gáibidii ahte áššáskuhtti galgá dubmejuvvot áššáskuhttima vuođul, namalassii ráŋggáštuslága § 274 nuppi lađđasa mas daddjo ahte son gii skáidne nuppi mearkkašahtti bahuid ráŋggáštuvvo gitta 15 jahkái giddagassii.
Gjønnes Johansen čujuhii dasa ahte ráŋggáštuslága § 274 nuppi lađđasis lea ráŋggáštusrádjá gitta 15 jagi. Son deattuhii dušše lihkkun go áššáskuhtton almmái ii šaddan olmmošgoddin.
– Dat livččii sáhttán mannat ollu vearrábut. Áššáskuhttineiseváldi oaivvilda ahte ráŋggáštusmihtideapmi dán áššis govvida ášši duođalašvuođa, ja daid vahágiid maid lea dagahan gillájeaddjái.
Áktor Karoline Gjønnes Johansen dasto dáhtui dikki dubmet áššáskuhtton albmá eavttuhis giddagassii 5 jahkái ja 8 mánnui.
Gáibida buhtadusa gillájeaddjái
Gillájeaddji bealušteaddji advokáhtta Trond Biti muitala lágamánnerievttis ahte gillájeaddji gillá oaivebákčasiin, kronalaš migreniin ja PSTD:IN maŋŋá dáhpáhusa guokte ja bealle jagi áigi.
– Dat lea váttis dadjat justa makkár supmi šaddá juohke jagi, muhto mii gullat ahte son galgá iešguđetlágan dálkkodemiide ja divššuide. Son lea maid ožžon goluid maŋŋá dan dáhpáhusa.
Vaikke almmolašvuohta gokčá eanaš dáin, de bohtet leat golut maid son ii oaččo gokčojuvvot, lohká Trond Biti lágasteamis.
Dasto gáibidii Biti ahte gillájeaddjái mieđihuvvo buhtadus rievtti árvvoštallama vuođul ja áššáskuhtton almmái galgá máksit buhtadusa boahttevaš dienasmassimiid ovddas, ja dasa lassin ahte áššáskuhtton almmái galgá máksit boahttevaš goluid rievtti árvvoštallama vuođul.
Oaivvilda ahte galgá áššehuvvat
Áššáskuhtton albmá bealušteaddji advokáhtta Hans Arne Nysaeter lágastii ahte áššáskuhtton almmái ii sáhte dubmejuvvot go lei sáhka iešsuodjalusas ja jus dubmejuvvo de ii sáhte su dubmet dan vuođul ahte son lei čielggus dáhpáhusáiggis.
– Oaivvildan ahte son galgá áššehuvvat, dii fertebehtet árvvoštallat juohke dearpaleami sierra ja son ii galgga dubmejuvvot goit dan guokte vuosttaš dearpaleami ovddas.
– Mun oaivvildan ahte dat lea beare streaŋggis dubmet su badjel vihtta jagi giddagassii, dás ii leat sáhka ovtta provoserekeahttá dagus. Dás lea sáhka heahtegádjunrievtti rihkkumis, lohká advokáhta Nysaeter.
Áššáskuhtton albmá bealušteaddji oaivvilda áššáskuhtton almmái galgá áššehuvvat ráŋggáštusgáibádusas ja buhtadusgáibádusas. Hålogalándda lágamánneriekti cealká duomu áššis guovvamánu 10.beaivvi dii.12:00.