Imaš go storrejit boazodoalu hálddašit dakkár heajos lágain
Maŋŋá diimma goavvejagi boazodoalus lea juolluduvvon liigeroassodoarjja boazodollui. Lea Eanandoalo- ja biebmodepartemeanta ovttas Norgga Boazosápmelaččaid Riikkaservviin (NBR) mearridan doarjjaortnega mii galgá unnidit ekonomalaš váttisvuođaid mannan dálvvi goavvejagi maŋŋá. Das lea biddjon eaktu ahte galggat ovdal olahan buvttadandoarjaga jus galggat oažžut ávkki dan «goavvejagi doarjagis». Ollu siidaoasit eai ane makkár ge ávkki dan ge doarjagis go boazodoalloláhka lea nu heitot, ahte olu siidaoasit gahččet eret boazodoallošiehtadusa buriin. Okta sis lea Skuohtanjárgga orohaga badjealmmái Anders Nils Klemetsen Eira. Son ii leat ge ožžon doarjaga diibmá, 2020:s, de ii sáhte ohcat dan earenomáš roassodoarjaga ge.
Su ášši lea ge erenoamáš buorre ovdamearka man heajos láhka lea boazodoalus. Dat lea ge nu heitot ahte lea imaš ja ártet go boazodoalloeiseválddit oktan boazodoallostivrrain oba storrejit ge dainna hálddašit eamiálbmotealáhusa. Anders Nils Eira ášši lea ge gahččan eret doarjjaortnegiin go son válddii badjelassii siidaoasi mas ledje dan jagi registrerejuvvon 20 bohcco. Dalle bat leat eiseválddit fuomášan ahte Eira galgá maid njuovvat iežas ealu 20 heggii jus galgá olahit doarjaga. Dakkár mearrádusa dahket vaikke su boazolohku lea vulobealde dan mearriduvvon logu mii siidaoassái lea ovdal mearriduvvon. Lea ge njuolgut imaš go sutnje sáhttet boazodoalloeiseválddit boazodoallolágain biehttalit doarjagiid. NBR jođiheaddji dieđuid mielde leat ge 100 siidaoasi mat eai oaččo «goavvejagi doarjaga» go eai leat siskkobealde boazodoallošiehtadusa njuolggadusaid. Dat dieđus muitala ahte ollu boazoeaiggádiin lea dál erenoamáš váttis dilli go sii eai oaččo buvttadandoarjagiid boazodoallošiehtadusas, ja dasa lassin eai oaččo maide dan heahtedoarjagis. Dáid siidaosiin lea juo unnit ruhta birgejupmái go visot doallu lea iežaset priváhta ruhtaburssa duohken, ja dál šaddet vel mannan dálvvi guohtonroasu dustet veahki haga. Dat lea njuolgut surgat.
Ollu siidaoasit eai ane makkár ge ávkki dan ge doarjagis go boazodoalloláhka lea nu heitot, ahte olu siidaoasit gahččet eret boazodoallošiehtadusa buriin.
Boazodoallolága dieđus ferte ođastit, ja dan barggu lea álggahan Sámediggi ovttas Norgga Boazosápmelaččaid Riikaservviin. Liikká diehtit ahte láhkabarggut mannet njozet, nu ahte dassážii go boazodoalloláhka ođastuvvo, de dáidá dálá láhka dahkan olusiidda bárttiid. Dán rádjái juo leat oaidnán makkár bárttiid dat lea olu boazoeaiggádiidda dahkan. Soaittášii baicce ollu jođaneabbo bargu divvut dušše muhtun paragráfaid boazodoallolágas ovdalii go ođastit olles lága.