4 MILJOVNNA koronaruvnno Sámediggái
Sámediggi oaččui heahteruđain 4 miljovnna ruvnno koronaruhtan.
Sámediggi čállá preassadieđáhusas ahte ráđđehus evttoha dálá heahtepáhkas bidjat 4 miljon ruvnno sámi ealáhusaide sihkkarastin dihte diehttevašvuođa ealáhussii gáibideaddji áiggis.
– Mun lean movttet go min leat guldalan, ja go ráđđehus dál evttoha koronaruđaid Sámediggái.
Dán geažil sáhttit mii nannet doarjjaortnegiid sin ektui geaidda roassu lea čuohcan. Dasto deattuhan ahte 4 miljovnna ruvnno 16,3 miljárddas lea dušše smávva oasáš heahtepáhkas, dadjá sámediggeráđđi Silje Karine Muotka (NSR).
Muotka muitala Ávvirii ahte livčče dárbbašan eanet doaibmabijuid, muhto lohká Sámedikki maid vuoruhan lasihit doaibmadoarjaga dán jagáš bušehttii.
– Dat mielddisbuktá veaháš liigeruđa. Dieđus livččii buore veahá eanet, muhto 4 miljovnna lea aŋkke buoret go ii mihkke, oaivvilda Muotka.
Čuohcan ealáhusaide
Ráđđehus ovddidii ođđa heahtepáhka preassakonferánssas odne. Doppe bođii ovdan ahte evttohuvvojit doaibmabijut oktiibuot 16,3 miljárdda ruvnno ovddas.
Sámi ealáhusaide lea virus čuohcan garrasit. Oallugat vásihit ahte gávpejohtu lea leamaš heittot. Muotka oaivvilda ahte čavga doaibmabijut, maiguin bissehit njoammuma, leat maiddái bággen muhtun fitnodagaid unnidit doaimma. Su dieđuid mielde vásihit ollu fitnodagat ain likviditehtaja máksinváttisvuođaid.
Muotka dadjá ahte heahtepáhkas leat doaibmabijut ollu servodatsurggiin, ja sii áigot geahččat makkár suorggit lea vuoruhuvvon ovdal go mearridit movt juhket ruđa maid Sámediggi galgá hálddašit.
– Mun vuorddán ahte ráđđehusa heahtepáhkka muđui deaivá sámi servodaga bures. Mii maid fertet juohkit bures dieđuid doarjjaortnegiid birra, nu ahte sii geaidda roassu lea čuohcan dihtet doarjjaortnegiid birra, muitala Muotka.