Olles Sápmi deaivvadii DIGITÁLALAČČAT
Dán jagáš Sámi álbmotbeaivvi ávvudoalut šadde erenomážat koronadávdda dihte. Go buot riikarájit leat gitta ja go eat sáhttán deaivvadit, de lágiduvvojedje ávvudoalut miehtá Sámis digitála hámis.
Sámi álbmotbeaivi ávvudoalut ledje sihke ipmilbálvalusat, levgemat ja sártnit gieldda sátnejođiheddjiin miehtá Sámi. Dás oainnát oasi Sámi doaluin.
Porsáŋgu:
Porsáŋggu gieldda Sámi giella- ja kulturguovddáš ávvudii Sámi álbmotbeaivvi gieldda Facebook-siiddus. Gielda almmuhii Porsáŋggu sátnejođiheaddji ja Sámedikki presideantta Aili Keskitalo sártni.
Sámedikki presideanta Aili Keskitalo dajai sártnistis ahte mii eallit imašlaš máilmmis gos rohttudávda njoammu mii gáržžida min eallima. Son ávžžuhii maid ávvudit min iežamet beaivvi digitála hámis ja návddašit álbmotbeaivvi.
– Gávdnojit beaivvit mat báitet eanet go eará beaivvit, ja odne lea dakkár beaivi – min iežamet beaivi, Sámi álbmotbeaivi. Dál eambbo go ovdal mii dovdat man deaŧalaš lea ovttastallat earáiguin ja čalmmustahttit earenomáš beivviid ja historjjálaš dáhpáhusaid.
– Mii hukset ja nanusmahttit boahttevaš buolvvaid sápmelaččaid go árvvus atnit ja ávvudit sámi ja sápmelašvuođa. Seamma láhkai go dahke 1917:s go deaivvadedje vuosttas sámi riikačoahkkimii. Vaikko lea gollán čuohti jagi de mii dárbbašit ain áŋgiruššat ja gozihit ahte áššit mat gusket midjiide galget minguin čielggaduvvot. Sávan váimmolaš lihkku Sámi álbmotbeivviin, sávai Sámedikki presideanta Aili Keskitalo.
Porsáŋggu gieldda sátnejođiheaddji Aina Borch čilgii ahte mii ávvudit Sámi álbmotbeaivvi eará ládje earenomáš áiggis.
– Lea deaŧalaš ávvudit ja doalahit árbevieruid. Sámi álbmotbeaivi lea ávvubeaivi, ja beaivi lea fas ihtán ja movttiidahttá ja buktá doaivaga, muitalii son sámegillii.
Kárášjohka
Kárášjoga gielda bovdii álbmoga ávvudit Sámi álbmotbeaivvi digitála čovdosa bokte. Kárášjoga sátnejođiheaddji, Svein Atle Somby, doalai ávvusártni mas namuhii sihke rohttudávdda ja álbmotbeaivvi deaŧalašvuođa.
– Sávan buohkaide lihkku Sámi álbmotbeaivái. Odne mii levget sámi álbmoga váras. Sámi oktavuođas jahkásaš ávvudeapmi ja ahte mii leat okta álbmot njuorasmahttá mu. Dán beaivvi leat ávvudan 30 jagi ja dáppe Kárášjogas lea dat sajáiduvvan alla bassin gos mii čoahkkanit ja čalmmustahttit beaivvi kultuvrralaš doaluin. Mannan jahki leai earenomáš jahki go máilbmái čuozai njoammudávda. Virus váikkuha maiddái min beaivvalaš dillái.
Oslo:
Norgga oaivegávpogis álge ávvudoalut iđđedis ovccis. Lei sihke bielločuojaheapmi ja leavgageassin, ja Oslo gávpoga sátnejođiheaddji Marianne Borgen, Sámi Viesu stivrajođiheaddji Per Olav Nymo ja sámepolitihkalaš ovddasteaddjit dolle sártnit. Noereh jođiheaddji Elen Ravna doalai sártni ja sámi mánáidgárddi mánát ovdanbukte Sámi soga lávlaga.
Romsa:
Gáisi giellaguovddáš sáddii ávvudoaluid ráđđeviesus Romssas. Romssa sámeluohkát besset dán jagi maid guoimmuhit ja lávlut Romssa ráđđeviesus . Geahččit besse čuovvut guoimmuheami neahta bakte. Sámedikki presideanta Aili Keskitalo doalai sártni ja maiddái Romssa gieldda sátnejođiheaddji Gunnar Wilhelmsen. Risten Anine Gaup juoiggai ja Nordaførr lávllui.
– Addá midjiide gullevašvuođa ja nanusmahttit boahttevaš buolvvaid go ávvudit Sámi álbmotbeaivvi. Lea maid beaivi jurddašit makkár boahtteáiggi mii háliidit Sámis ja makkár dilis galget min mánát bajásšaddat. Dán jagi lea maid válgajahki go buohkat sáhttet váikkuhit dillái ja oasálastit servodatdigaštallamis, dajai Sámedikki presideanta Aili Keskitalo sártnis Romssa ávvudandoaluin.
– Otná beaivi lea illubeaivi ja min iežamet beaivi beroškeahttá gos mii orrut ja ávvudehpet ja návddašehpet. Lihkku beivviin, sávai Keskitalo.
– Romssas orrot olu sápmelaččat ja atnit árvvus máŋggabealatvuođa. Lea deaŧalaš munnje ahte suodjalit dan. Mii leat ollen guhkás muhto olu dárbbašuvvo ain dahkkot. Vašši gávdno min gávpogis ja 2019:s Jon Richard fallehuvvui gos sus leai gákti badjelis, ja Ann-marie cielahuvvui go sámástii. Mii livččiimet galgan ollet guhkibut čuohti jagis. Mii eat dohkket dakkár dáhpáhusaid ja
vuosttaldit cielaheami ja álggaheimmet kampánnja «Doarvái dál», dajai Wilhelmsen sártnis. Romsa lea sámi gávpot ja sámi suohkan ja odne mii ávvudit. Ráhkis álbmot, lihkku beivviin!
Stuehkie:
Ruoŧa oaivegávpogis ávvudedje Sámi álbmotbeaivvi go levgeje sámi leavggain Stuhkie stádaviesu olggobealde lávvordaga iđđedis. Stuhkie gávpoga sátnejođiheaddji Cecilia Brinck doalai sártni ja Nik Märak juoiggai.
Sofia Jannokas lei digitála konsearta.
Eahkesbeaivvi lágidii maid Stuhkie sámesearvi konsearttaid ja ságastallamiid main fáddá lei goahti ja girječállit Nils Henrik Sikku ja Katarina Pirak Sikku muitaleigga iežaska girjji birra.
Johkamohkki:
Johkamohki digitála márkandoaluin ávvudedje Sámi álbmotbeaivvi ja sáddeje njuolgga máŋga diimmu studios gos ledje ságastallamat ja guossit. Jođiheaddji lei Maxida Märak ja guossi das lei Katarina Pirak Sikku.
Gárasavvon:
Sámi veagaid searvi lágidii doaluid Gárasavvonis gos mánát lávlo ja levgejedje sámi leavggain.
Troandin:
Norgga girku ovttasbarggai Saemien Åålmege – sámi searvegottiin Lulli-sámi guovllus ja sáddeje ipmilbálvalusa Sámi álbmotbeaivvi.
Eará doalut mat sáddejuvvojit eahkesbeaivvi Sámi álbmotbeaivvi:
Staare:
Sámi álbmotbeaivvi lágidit Krokoms sámi hálddašansuohkan ja Jijsen Siebrie doaluid. Hanna Nuttis lea digitála konsearta, ja čuojaha iežas musihka.
Anár:
Suoma beale Sámediggi bovde buohkaid ávvudit Sámi álbmotbeaivvi njuolggosáddaga bokte. Doalut álget 18.00 Suoma áigge.
Guovdageaidnu:
Guovdageainnus ávvudedje Sámi álbmotbeaivvi digitála doaluin. Doalut álge dii. 15.00.
Deatnu:
Deanu gielda sádde Sámi álbmotbeaivvi prográmma Facebooka bokte diibmu 17. Deanu Searaid jođiheaddji Markus Heiberg doallá sártni. Sara Marielle Gaup Beaska guovttos Åsá Márgget Antiin juoigaba, ja Deanu kulturskuvlla filbma čájehuvvo. Diddi mánáidgárddi, Giellavielgu mánáidgárddi ja Deanu Sámeskuvlla mánát lávlot. Sátnejođiheaddji Helga Pedersen doallá vel sártni.
Unjárggas:
Unjárggas ávvudit Sámi álbmotbeaivvi Várjjat Sámi museas. Prográmmas ledje sámi báikenamat ja filbma, ja njoarostallamat olgun. Sámediggeáirras ja Norgga Sámiid Riikkasearvvi jođiheaddji Beaska Niillas doallá sártni.