De gal Nils Jøranis lea ođđa, BUORRE VUOJÁN
Nils Jøran Eira oaččui veahki oappás Máret Elles ja máhkasásas Hans Norbyes ásahit Spleisa. Dál leat čoaggán badjel 200 000 ruvnnu ja Nils Jørana niehku oastit boagánstuolu lea ollašuvvan.
– Lean juo geahččalan vuojána, muhto son gii buvttii dan lei guođđán dan ala, nu ahte in beassan nu olu vuodjit dainna. Ferten vuos láddet dan, čilge hui movttegis Nils Jøran Ávvirii. Son lea aiddo ožžon ođđa vuojána.
Čoakkestii ruđa Spleisa bokte
Nils Jøran bártida deahkkedávddain mii dagaha ahte son ii šat goastta seamma ládje go ovdal. Juo mánnán oaččui dieđu ahte dađistaga šaddá son juvlastullui. Dál lea Nils Jøran 34-jahkásaš ja juvlastuollu leamaš oassi su eallimis juo logi jagi. Geasset manná bures, muhto Guovdageainnus lea 7 mánu muohta ja nu šaddá váttisin goastat. Danne čoaggigohte ge ruđa oastit dakkár boagánstuolu.
Go Nils Jørana máhkasássa ja spábbačiekčannásti Hans Norbye álggahii Spleisa juovlamánu álggus, de Nils Jøran ja su bearaš eai vuordán ahte nagodit čohkket jur 233 000 ruvnno. Dál moadde mánu maŋŋel de vuojaša Nils Jøran áibbas ođđa vuojániin.
Beassá dahkat dan maid háliida
– Dál go lea ođđa vuoján de beasan fas meahccái ealu lusa, oaggut, čorget muohttaga ja čuovvut mielde heargegilvvuid ge. Soaittán sáhttit heargevuodjinbána ráhkadit ja čuoiganláhtu ge vuodjit. Iežan viessošiljus goit beasan dál muohttaga hoigat ja soaitá ránnjá ge dárbbašit veahki. Dát lea buorre vuoján, muitala Nils Jøran.
Nils Jøranis lea iežas heargevuodjinjoavku Team Nils Jøran. Goastat bána lusa lea leamaš hástalussan.
– Dál lea nu somá go beasan go mus lea albma vuoján. Mun in leat bálljo oađđán dan rájes go vuojána ožžon. Nu jalla speanta ja jurddašan čađa gaskka maid sáhtán bargat go mus lea dát stuollu. Justa dál leange Álttás ohcame muohtahoiganasa ja eará rusttegiid vel stullui, lohká Nils Jøran ieš.
Gievrras stuollu
Dákkár stuollu máksá ođasnaga masá miljonbeale ruvnnu. Dál leat gávdnan stuolu vuollel 200 000 ruvdnui. Boagánstuollu man Nils Jøran dál lea oastán lea oalle erenoamáš stuollu. Čohkkánsadji lieggana, das lea elektrovnnalaš mohtor mii ii rieja ja dainna lea linis vuodjit. Dasa lassin sáhttá maid geassit olles 1000 kilo ja dasa sáhttá goallostit goallosvovnna.
– Jøran lea dakkáraš olmmái geasa lea álki liikot, ja leat hui ollu olbmot geat dovdet su. Eai dáidde nu ollu earát geat ánssášit dán nu ollu go son dahká. Son ii leat goassege váidalan eai ge sus leat goassege ákkat. Nu ahte mun jurdilin ahte lea goit veara geahččalit čoaggit ruđa, ja dál čájehuvvo ahte lei dan veara, logai Nils Jørana máhkasássa ja spábbačiekčannásti Hans Norbye Ávvirii jur ovdalaš juovllaid go ledje nagodan čoaggit eanaš ruđa.