– Čálistii ja fáhkka lei gilgga alde
Guorbmebiila lei gilgga alde guovdu Guovdageainnu. – Sávvamis nagodit gádjut guorpmi, lohká vuoddji.
Son bođii Hámmárfeasttas luossagurpmiin duorastaga iđida, ja lei jođus vuos Ruŧŧii, gos guolit ain galge viidáseappot Spániai.
– Eai dál guolit soaitte joavdat gal dohko, muhto sávvamis mii nagodit gádjut guorpmi, lohká son.
Dievdu muitala rahpasit mii geavai go su guorbmebiila geavai gilgga ala Guovdageainnus. Son ii hálit namas aviisii ii ge hálit lagas gova ge alddis aviisii.
Dievdu lea goalmmátlotjahkásaš, ja lea eret Litauenis. Lohká iežas máŋga jagi vuodján guorbmebiillain dáppe.
– Dat manná bures muinna. In leat moktege roasmmohuvvan, in bávččagan ge. Manai hui fiidnát. Ii leat mihkke stuorát dáhpáhusaid go ahte lea gilgga ala ravgan mu guorbmebiila, muitala son.
Biila ovddal
Hámmarfeasttas devddii biilla máŋgalogi tonna biebmoluosain, ovdal go dollii Guovdageidnui man meaddil vuodjá go Ruŧŧii áiggui. Son lea biebmoluosaid fievrrideame Eurohpái, Ruoŧa bokte.
Go Ávvir fitná lihkuhisvuođabáikkiis, de lei gádjunbiila juo báikkiis, ja vuoddji ieš maid lei das goaivume veahkkin.
– Go ledjen dán luohká vulos vuodjime, de bođii biila ovddal. Vujii hui guovdu. Mun galgen dušše veahá eanet garvilit, muhto de čálistii. Geahččalin vel bonjastii stivrrana vai fas luotta ala beasan, muhto dakko lei roggi luoddaguoras gokko ii lean vejolaš beassat bajás šat, muitala Litauena dievdu.
Ii vuojihahtti
Guorbmebiila lea čálistan luottas eret njuolga maŋŋel Esso bajit luoddaearu, ja das lea čierastan gitta vuolit luoddaerrui.
Das gaskkas lea maid vuodján veallut luoddačuovggaid, ja šilttaid, ovdal go de lea bisánan.
Biillas lea dáhkki roakčanan bahuid, nu várra ii leat vuojeháhtti šat, nu ahte jáhkkimis guorpmi šaddet viežžat eará guorbmebiillain.
Njalkkas
Guorbmebiilla vuoddji muitala ahte dovdui oalle njalkkas go son vujii.
– Lei ovdajuvla mii čálistii. Dovden ahte lei veahá njalkkas go vudjen, muhto ii lean dan dihte go čálistii luottas eret. Deahkat maid leat mus buorit, nu ii lean dat ággan manin geavai ná, lohká son.
Guorbmebiillas ledje áibbas ođđa deahkat juohke nuppi juvlaákselis, deahkat gaskkas eai lean nu buorit.
Ii oaivvážis
Guorbmebiila lea gopmanan birrasii bealčieža áigge iđđes, muhto ii galgga, politiijaid dieđu mielde, oktage roasmmohuvvan.
– Mii eat várot vuoddji geavahan makkárge gárrenmirkkuid, ja lea dušše gopmánan, lohká Finnmárkku politiijaguovllu operašuvdnajođiheaddji, Bjørn Tormod Syversen Ávvirii.