Skuvlageainnu ferte sihkkarastit
Stuora guorbmebiila lea čálistan ja gopmánan Guovdageainnu guovddášbáikkis. Guorbmabiila, mii lei devdon máŋggaid tonnaid biepmoluosain, lei boahtime Hámmarfeasttas ja jođus Ruŧŧii ja dasto Spániai. Dasto lei lunddolaš ja bággu vuodjit Guovdageainnu bokte. E45 geaidnu, mii doalvu min Supmii ja Ruŧŧii, manná čađa gili ja jahkásaččat vudjet máŋga duháha guorbmebiilla dan luoddaráigge. Dan luoddaráigge vánddaridt maid olbmot ja eandalii skuvlamánát.
Jur Esso bokte lei guorbmebiila gopmánan. Son lea iežas čilgehusa mielde boahtán vuoji hoteallaluohká go biila mii ovddal bođii lei beare guovdu luotta. Guorbmebiilavuoddji čilge ahte son áiggui garvilit biilla ja nu geavai lihkuhisvuohta. Guorbmebiilavuoddji ii lean roasmmohuvvan ja váivašuvai eanemus iežas gurpmiin. Son sávai guorpmi nagodit gádjut.
Mii diehttelasat maid jurddašat dan guorpmi. Dattege jurddašat ja váivašuvvat eará áššiin. Ii leat oainnat vuosttaš geardde go dan luohkás lea biilalihkuhisvuohta. Dán háve lea lossa guorbmebiila gopmánan justa dakko gokko skuvlaoahppit ja earát rasttildit luotta. Dán háve dáhpáhuvai lihkuhisvuohta ovdal skuvlaáiggi ja nu eai lean skuvlamánát justa jođus skuvlii. Politiijat maid dieđihit ahte ii oktage leat roasmmohuvvan.
Dat livččii sáhttán dáhpáhuvvat váile bealovccis. Livččii sáhttán dáhpáhuvvat justa dalle go muhtin mánná lea rasttildeame luotta go galgá skuvlii. De livččii sáhttán šaddat oba issoras lihkuhisvuohta. Lea dušše lihkku go ii geavvan dalle go olbmot vánddardit. Lea dušše lihkku go muhtin ii gártan guorbmebbiilla vuollái. Lea dušše lihkku ahte ii oktage duššan dan lihkuhisvuođas.
Guovdgeainnu suohkan lea ovdal váidalan dán luohká geaidnodoaimmahahkii ja doaimmahat lea lohpidan geahččat johtolatsihkarvuođa das. Dássážii ii galgga dat vel dáhpáhuvvan. Ovddeš sátnejođiheaddji Johan Vasara lohká vuddjiid biehkut luohká go lea veadjemeahttun goazastit ja bisánit jus juoga geavvá vulosvuojedettiin. Vasara dieđuid mielde de galgá maid leat váttis gákcut luohká ja dasto šaddet liigeleahtuin vuodjit bajás. Dasto lea dat bissovaš váttisvuohta ja bissovaš váralaš luodda.
Oba máŋgii leatge váhnemat muitalan movt ballet mánáid sáddemis okto skuvlii justa danne go šaddet dan geainnu rasttildit. Váhnemat leat oba máŋgii váidalan go oidnet dan luohkás vuodjime beare leahtuin. Mii guorrasat dasa ja gáibidit čovdosa. Skuvlamánáin galgá oadjebas skuvlageaidnu.
Lea dušše lihkku go muhtin ii gártan guorbmebiilla vuollái. Lea dušše lihkku go ii oktage duššan lihkuhisvuođas.