Hellodatsearvegoddi ii oaččo šat doarjaga
Dássážii leat smávva searvegottážat ožžon doarjagiid gielddain. Dán jagi rájes de rievdá dat.
Guovdageainnu suohkan mávssii diibmá badjelaš 100 000 ruvnno doarjjan osku- ja eallinoaidnoservodagaide, lassin doarjagii mii manná Norgga Girkui.
Dán jagi rájes eai dárbbaš šat dán dahkat, go láhkarievdan mii doaibmagođii ođđajagimánu 1. beaivvi rájes, mielddisbuktá ahte Stáhtahálddašeaddji dat hálddaša doarjjaortnega.
Mánáid- ja bearašdepartemeanta lea mearridan ahte Stáhtahálddašeaddji Oslos ja Vikenis bisuha ovddasvástádusa iežas fylkkain, ja Agdera Stáhtahálddašeaddji ges hálddaša osku- ja eallinoaidnodoarjagiid muđuid riikii.
Váikkuha smávva searvegottážiidda
Dasa lassin eai oaččo šat osku- ja eallinoaidnoservodagat main leat unnit go 50 čálihuvvon miellahtu, ruhtadoarjaga.
Guovdageainnus dát guoská guovtti searvegoddái mat leat báikkálaččat, namalassii Sion Kautokeino ja Eben Eser Hellodatsearvegoddi, main leat vuollel 50 miellahttu goappásge. Sii leat dássážii ožžon doarjaga suohkanis.
Richard Mattias Sikku Valio, guhte lea Guovdageainnu Eben Eser Hellodatsearvegotti gulahallanolmmoš, lohká dán doarjaga leamašan buorren sin searvegoddái. 2020 ožžo birrasiid 28 600 ruvnno doarjjan.
– Das lea leamašan mearkkašupmi, lea leamašan buorre oažžut doarjaga suohkanis ja das lea leamašan ávki min bargui, lohká Sikku Valio.
Son muitala alddiineaset leat olggosgoluid searvegottis, nu mo searvegoddevistti doallat, muhto maid eará goluid:
– Mis leat ovttasbargoguoimmit geaid lávet doarjut, lávet doarjut eará bargiid, evangelisttaid geat Sámis barget doalvut sága Jesusa birra. Ja dál in dieđe mo dát šaddá, čilge Sikku Valio.
Badjelaš 109 000 juohkán 2020:s
Registrerejuvvon osku- ja eallinoaidnoservodagat leat dássážii sáhttán gáibidit stáhta ja gieldda doarjaga. Gielddaid doarjja rehkenastui gieldda girkobušeahta vuođul, mii juhkkojuvvui juohke Norgga girkomiellahto nammii gielddas.
Guovdageainnu suohkana girkobušeahtas 2020 várás lei 2 615 000 miljovnna ruvnno, ja suohkanis ledje 2556 olbmo čálihuvvon Norgga girku miellahttun dalle. Go doarjaga juohká de dat dagaha 1023,08 ruvnno juohke olbmo nammii.
Dán supmi vuođul de jugii suohkan maiddái doarjaga daid eará osku- ja eallinoaidnoservodagaide, main leat čálihuvvon miellahtut geat ásset suohkanis.
2020:s ledje 107 olbmo suohkanis mat gulle eará osku- ja eallinoaidnoservodagaide, ja doarjja dáidda servodagaide gártá de 109 469,56 ruvnno. Dát olbmot gullet 14 iešguđet osku- ja eallinoaidnoservodahkii.
Sávvá iežaset nagodit ain doaibmat
Guovdageainnu Eben Eser Hellodatsearvegotti gulahallanolmmoš, Richard Mattias Sikku Valio, lohká váttisin vuos diehtit juste makkár váikkuhusat sin searvegoddái šaddet.
– Dan in dieđe vel konkrehta man stuorrát dát sáhttá váikkuhit, go lea nu aitto doaibmagoahtán dát láhkarievdadus. Muhto mii leat oskosearvegoddi ja sávvat ahte nagodat ain doaibmat, lohká son.
Sisaboađu iige leat nu álki hahkat:
– Na okta vejolašvuohta gal lea dieđus jus miellahtut addet ruđa, dan maid gohčodat kolleaktan, čilge son.
Eanas oassi manai olggos suohkanis
Eanas oassi dan badjelaš 100 000 ruvnnos maid suohkan mávssii daid eará servodagaide, manne olggos suohkanis.
Oktiibuot suohkan de jugii 2 724 469,56 ruvnno doarjjan iešguđet osku- ja eallinoaidnoservodagaide 2020:s, muhto dan eai dárbbaš šat 2021 rájes dahkat.