Guoddala duomu
Guovdageaidnulaš Mihkkal Ante Oskal dubmehalai Hålogalándda Lágamánnerievttis lobiheamet lodden miessemánu 17. beaivvi 2018:s
Son dubmehalai giddagassii 14 beaivái, ja maid máksit 15 000 ruvdnosaš sáhku. Jus ii sáhku mávsse, de šaddá vel 30 beaivvi giddagassii dan ovddas.
Dasa lassin son massá bivdolobi jahkái, ja massá maid Remington 870 express nammasaš hávlára, mii sus lei mielde, ja vel 31 hávlárlátta.
Duopmu celkui ovtta jiena vuostá. Okta mielduopmár áššehuhtii Oskála.
Dan ovtta mielduopmára oaivil čállo ná duomus::
«Unnitlohku lea ovttaoaivilis eanetloguin dikkis ahte bivdoáiggi ja bivdoguovlluid dáfus bivdoráddjen rihkku sápmelaččaid árbevieru dan ektui ahte go galget loddet – muhto son lea dan oaivilis ahte árbevierru ferte mannat ovddabeallái loddengildosa, nu go dat boahtá ovdan lágas ja njuolggadusain. Unnitlohku dadjá ahte regulerejuvvon bivdu ii leat doarvái fievrredit viidáseappot sámi árbevirolaš máhtu mii dan bivddus lea, eaige oro doarvái garra biras- ja elliidsuodjalusberoštumit mat galggašedje dagahit ahte ii galgga sáhttit bidjat mearrideaddji deattu árbevirrui dán áššis. Muđui čujuha son diggegotti duomu eanetlogu vuođuštussii.»
Guoddala
Oskal ii leat eahpádusas ge, Ávvir hupmá suinna:
go
– Dien mun gal guoddalan. Lean juo addán dieđu iežan bealušteaddjái ahte mun in dohkket dien duomu ja mun áiggun guoddalit dan, lohká son Ávvirii. Miessemánu 17. beaivvi 2018:s vulggii Oskal eatnogáddái oahpahit árbevirolaš loddema iežas unnavieljažii, ja várret maid alcces čillasaji ovdal go bivdu álgá vahku maŋŋel.
Go leigga doppe, de bođii Stáhta Luonddubearráigeahčču gii váruhii Oskala loddeme lobiheamet. Čakčamánu 15. beaivvi celkui duopmu Sis-finnmárkku diggegottis áššis, ja son áššehuvai. Stáda bealis guoddaluvvui ášši lágamánneriektái.