NBR ii leat vel ohcagoahtán OĐĐA JOĐIHEADDJI
Dálá jođiheaddji lea dieđihan ahte son luohpá jođiheaddjin riikkačoahkkimis ja bargu gávdnat ođđa jođiheaddji ii leat vel álggahuvvon NBR bealis.
Ođđajagemánu gaskamuttus dieđihii Norgga Boazosápmelaččaid Riikkasearvvi (NBR) jođiheaddji Ellinor Marita Jåma ahte son álgá suohkandirektevran iežas ruovttusuohkanii, Ravrvihkii, njukčamánu 1. beaivvi ja ahte son danne luohpá NBR jođiheaddjin boahtte riikkačoahkkima oktavuođas.
Dál lea golihan mánnu dan rájes go Jåma almmolaččat dieđihii ahte son luohpá, muhto bargu gávdnat ođđa jođiheaddji ii leat vel álggahuvvon válgalávdegottis.
Ii loga gullan maide
Válgalávdegotti jođiheaddji Torstein Appfjell muitala Ávvirii ahte son ii leat vel gullan maide NBR hálddahusas dan birra ahte sii galget gávdnat ođđa jođiheaddji, muhto mediaid bokte lohká oaidnán ahte Jåma luohpá jođiheaddjin.
– Mii diehtit ahte Jåma lea dieđihan ahte son ii joatkke jođiheaddjin, muhto dađi eambbo eat leat gal gullan. Mus leat hui ollu boazobarggut leamaš maŋemus áiggiid, nu ahte in leat oba astan ge váldit oktavuođa hálddahusain ja válgalávdegotti miellahtuiguin, muhto nu jođánit go fal jaskkodivččii veaháš de mii čoahkkinastit, dadjá Appfjell.
Go Ávvir lea oktavuođas NBR hálddahusain, de ii leat vel mearriduvvon goas riikkačoahkkin lágiduvvo.
– Ferte vuoruhuvvot
Ellinor Marita Jåma lea leamaš NBR jođiheaddji 2014 rájes, ja son lea nubbi nissonolmmoš gii jođiha riikkasearvvi. Dál dadjá Appfjell ahte šaddá stuora bargu gávdnat jođiheaddji gii fátmmasta buohkaid boazodoallonorggas.
– Mii fertet gávdnat buori jođiheaddji gii čohkke olles riikka boazodolliid. Nu ahte mis lea diehttelasat stuora bargu maid fertet bargat, ja dat dađi bahábut ii leat vel álggahuvvon, dadjá válgalávdegotti jođiheaddji.
– Dat lea bargu mii ferte vuoruhuvvot ja mađi árat mii sáhttit álgit bargguin, dađi buoret, lasiha son.
Háliida gulahallama
Go NBR 19. jođiheaddji galgá válljejuvvot, de háliida Appfjell buori gulahallama miellahtuiguin ja báikkálaš servviiguin. Appfjell ii loga iežas beroštit das gos jođiheaddji lea eret ja gosa gullá, nu guhká go sus leat bargonávccat ja bargá buori barggu boazodoalu ovddas.
– Lean čorgatvuođa dihte jurddašan ahte livččii vuogas gullat báikkálaš servviid jođiheddjiid oaiviliid ja evttohusaid, go válgalávdegoddi ii doaimma nu ahte lea oktoráđálaš, muhto guldaleaddji miellahtuid jurdagiidda. Mu persovnnalaš oaivil lea ahte mii fertet gávdnat dan buoremus jođiheaddji ja dan oaivila válddán mun mielde válgalávdegoddái, dadjá Appfjell.
– NBR lea nu dehálaš midjiide dán ealáhusas ahte mii fertet oažžut daid rievttes olbmuid jođihit min organisašuvnna, lasiha son.