Dásseárvoláhka gáhtte báhpaid maid
Norgga girku lea vuosttaš geardde lágidan bargobirasiskkadeami mo nissonbáhpat vásihit bargosaji, gaskavuođa bargoskihpáriidda ja muđui. Juohke goalmmát báhppa Davvi-hålogalándda bismagottis lea vásihan unohis dáhpáhusa sihke sohkabeali ja virggi dáfus. Davimus bismagottis leat 25 nissonbáhpa searvan iskkadeapmái, ja sin searvvis leat guhtta báhpa geat oaivvildit ahte bismagoddi ii bargga doarvái buori barggu dásseárvvu ektui. Davvi-hålogalándda bisma Olav Øygard dadjá Ávvirii ahte dan ferte njulget ja seammás deattuhit ahte nissonbáhpaid bargu lea hirbmat mávssolaš.
Dieđusge lea buorre go bisma oaidná dien beali dehálažžan njulget, muhto dat iskkadeapmi čájeha ahte ollu eará ferte njulget vai báhpat eai dárbbaš iežaset barggus vásihit vealahemiid. Danne lea ge dehálaš ahte dásseárvu ferte leat hui guovddážis girkolaš meanuin ja bargguin, ja dat guoská maiddái searvegodderáđiide ja dieđus searvegottiide, namalassii buohkaide geat leat Norgga Girku miellahtut. Dásseárvu ja dábálaš olmmošoaidnu gullá diehttelasat maiddái sámi guovlluide.
Norgga Girku iskkadeapmi lea ge čielga muittuhus ahte buot ii leat dan dáfus buorre.
Ii leat ge nu guhkes áigi go Kárášjoga báhppa Franziska Förster vásihii vuostehágu leat báhppan go lea nissonolmmoš. Dalle, namalassii 2016:s, geavai earret eará ahte Sámemišuvdna biehttalii su doallat ipmilabálvalusa Láhpoluobbala kapeallas. Son dovddai maid vuosteháguid Kárášjogas dalle. Álbmotčoahkkimis muitalii Franziska Förster ahte Kárášjoga girku hálddahusas olgguštit su. Loahpas son ráfi dihte luobai báhpa virggis ja fárrii eret Kárášjogas. Dat lea dušše muittuhus dasa, ahte dásseárvováttisvuođat sáhttet buot smávva servodagain maid čuožžilit.
Iešguđet searvegottit ja searvegodderáđit fertejit maid álot muitit, ahte Norggas lea dásseárvu sohkabeliid gaskkas gáhttejuvvon 1978 rájes dásseárvolágas. Dat láhka čavgejuvvui 2018:s, earenoamážit buoridan dihte nissonolbmuid ja unnitálbmogiid rivttiid. Norga dávjá gehččo njunnošis das mii guoská dásseárvui. Norgga Girku iskkadeapmi lea ge čielga muittuhus ahte buot ii leat dan dáfus buorre. Dan oaidnit maiddái politihkas ja jođiheaddjevirggiin ahte dievddut leat eanetlogus. Bálkáerohusat sohkabeliid gaskkas lea eará hástalus. Danne lea ge vuos ollu dahkamuš buoridan dihte dásseárvvu iešguđetlágan servodatsurggiin.
Lea dan láhkai ahte sihke Ovttastuvvon Našuvnnaid olmmošvuoigatvuođajulggaštus ja dásseárvo- ja vealahanláhka geatnegahtta garvit vealaheami sohkabeliid gaskkas. Dál lea ge Norgga Girkus buorre vejolašvuohta buoridišgoahtit dásseárvvu báhpaid gaskkas go leat ieža čađahan iskkadeami mii čájeha buoridan muni.