Hámmerfeastta soalddáhat eai beasa mielde ruovttusuodjalusa hárjehallamis
Dán vahkku álgá Ruovttusuodjalusas hárjehallan Čáhcesullos, Várggáin, Porsáŋggus, Guovdageainnus ja Kárášjogas, muhto Ruovttusuodjalusa soalddáhat geat leat Hámmerfeasttas eret eai beasa searvat hárjehallamii.
Dán vahkku ja boahtte vahkku plánejit hárjehallama čađahit, ja Ruovttusuodjalus čuovvu dárkilit njoammundili ovttas Suodjalusain ja siviila dearvvašvuođaeiseválddiin.
Njoammunsuodjaleamis čađahuvvo nu gohčoduvvon pre-screening ovdal go boahtá dohko ja screening go boahtá dohko. Soalddáhat biddjojuvvojit joavkkuide main leat dušše logis, ja fertejit čuovvut nationála njoammuneastadeami nu go doallat gaskka, gieđaid bassat, gieđaid spriitet ja njálbmesuoji geavahit, dieđiha Suodjalus hárjehallama birra.
Doalahit gearggusvuođa
Ruovttusuodjalus lea militeara gearggusvuođaorganisašuvdna ja soalddáhat galget oanehis áiggis sáhttit čoavdit čuolmmaid mat gusket ráfi, heađi ja soađi ektui. Jahkásaš hárjehallan lea hui dehálaš doalahit Ruovttusuodjalusa operatiivvalaš návcca.
– Mearrádus čađahit Ruovttusuodjalusa hárjehallamiid iešguđet diliin ferte árvvoštallojuvvot dan ektui movt riska lea njoammuma ektui go leat njoammuneastadandoaimmat, lohká oberstløytnánta Bernt Normann Lockert, gii lea son gii jođiha Finnmárkku ruovttusuodjalanguovllu 17, ja gullá Porsáŋgguguolbana leirii Leavnnjas.
Sus lea ipmárdus ahte hárjehallan sáhttá dagahit balu soapmásiidda go lea olu njoammun muhtin báikkiin Finnmárkkus, earenoamážit Hámmerfeasttas.
– Mii váldit njoammuneastadanbarggu duođalaččat. Earret eará eai galgga Hámmárfeastta soalddáhat gohččojuvvot hárjehallamii dán vuoru. Mii árvvoštallat dili dađistaga galgá go dat guoskat soalddáhiidda geat leat eará báikkiin eret gos dávda leavvá. Báikkálaš suohkandoaktárat leat cealkán ahte leat duhtavaččat maid Suodjalus lea ráhkadan ja miehtan hárjehallama čađaheami, lohká Lockert.
Čađahit moatti oasis
Hárjehallan čađahuvvo guovtti vuorus mii lea juhkkojuvvon 22. ja 23. vahkkui. Vuosttaš hárjehallan álgá dán vahkku, ja Várjjaga Ruovttusuodjalusguovlu hárjehallá Čáhcesullos ja Várggáin. Sihke befálain ja veagas leat sierra áiggit go galget searvat vai unnidit olmmošlogu nu ahte eai leat báikkis oktanaga. Vuosttažat bohtet lávvordaga ja maŋemusat vulget lávvordaga goappáge vahkkus.
Hárjehallamis galget čoavdit Ruovttusuodjalusa dábálaš bargguid, nu go sihkkarastit dehálaš infrastruktuvrra mat leat máŋga diŋggas, gozihit ja dárkkistit báikkiid ja gieđahallat ja čoavdit iešguđetge hástalusaid.
Siviilaservvodaga doarjut
Suodjalusa deháleamos bargu lea hukset Norgga sihkarvuođa ja oadjebasvuođa álbmogii. Go leat báikkis goziheame eana- ja mearraguovllu, de galgá Suodjalus leat gearggus suddjet riikka iežaset veagain ja ovttas earáiguin go dat gáibiduvvo. Suodjalus galgá maid doarjut ja gáhttet siviilaservvodaga go eiseválddit gohččot dahkat dan.
– Vai Suodjalus nákce buot dan, de ferte Suodjalus dávjá hárjehallat, ja Ruovttusuodjalus lea maid mielde das, lohká Lockert.