– Dál šaddá buorre leat sápmelažžan
Olggobealde Romssa ráđđeviesu ávvudedje gáfiin, gáhkuin ja sámi leavggaiguin. – Sámedikki ja Romssa suohkan ođđa ovttasbargošiehtadus lea historjjálaš buorre. Dál šaddá sámeviessu ja Romssa sámi mánáide lea dáhkiduvvon mánáidgárdi.
Nu celkkii NSR jođiheaddji ja sámediggeáirras Runar Myrnes Balto.
Ávvudedje olggobealde ráđđeviesu
Myrnes Balto ja Romssa Sámi Searvvi jođiheaddji Hilde Pedersen leigga bovden Romssa suohkan politihkkáriid ja preassa ávvudit dáhpáhusa gáhkuin ja gáfiin. Čoaska dálki ja arveoavttit eai baldán ávvudeddjiid geat ledje čoahkkanan olggobeallái Romssa ráđđeviesu.
– Ođđa ovttasbargošiehtadus Romssa suohkan duođaid váldá duođalaččat sin sámi álbmoga, sin sámi historjjá ja duođaid čájeha ahte háliidit ovddidit Sámi dáppe Romssas. Mun lean hui ilus go Sámediggi ja Romssa suohkan leat nagodan ná buori šiehtadusa hábmet, lohká Myrnes Balto.
– Romsa dáhttu ovdagovvan
Dán šiehtadusa lohket bealit historjjálažžan. Šiehtadus lea joatkka 2013 šiehtadusas, muhto lea nannejuvvon sakka. Dál dáhkida Romsa suohkan ahte buot sámi mánát ožžot sámi mánáidgárdesajiid. Maiddái Sámeviesu lohpidit sadjái. Romsa dáhttu leat ovdagovvan eará gávpogiidda.
Romssa Bargiidbellodaga joavkojođiheaddji Jarle Heitmann dat ovddastii suohkana gáhkkobeavddi luhtte.
– Dát šiehtadus lea oba dehálaš go mii han leat Sámi stuorámus gávpot. Dáppe ásset oba olu sámit ja lea áibbas lunddolaš ahte Romssa suohkanis lea ovttasbargošiehtadus ja oktasaš mihttu Sámedikkin. Mihttu lea nannet kultuvrra, skuvllaid ja mánáidgárddiid. Mii dáhkidat earet eará dál ahte sámi mánáidgárdemánát galget oažžut sámegielfálaldaga ja Romsa lea dat vuosttaš suohkan mii dan dáhkida. Dat mii maiddái lea dehálaš lea ahte cielaheapmi mii lea geavvan ja geavvá galgá jávkaduvvot, lohká Heitmann.