HEAHTEDILLI Gironis
Girona gielddas lei mannan vahkkus alimus njommonlohku olles Ruoŧas. Gieldda ságadoalli Gunnar Selberg dadjá dili leat roassun.
Norrbottena njoammunlohku lei mannan vahkkus 98 proseantta eanet go riikka gaskamearálaš logut. Gielda lea gidden buot doaimmaid eastadan dihte njoammuma.
Buohccedivššárjulia Marainen bargá Girona buohcceviesu fáhkkabuhcciid vuostáiváldimis. Son mieđiha ahte dilli lea vearáskan.
– Mis eai leat leamaš nu olu pasieanttat goassege geat dárbbašit divššu koronadávdda geažil. Olbmot dáppe eai čuovo šat eiseválddiid rávvagiid, čilge son.
Marainen čilge ahte olbmot mannet gávppiin olles veahkan ja ahte nuorat čoahkkanit beare stuora joavkkuide.
– Buohkat fertejit veahkehit eastadit njoammuma, ja Gironis olbmot eai leat geavahan njálbmesuoji, mii addá buori suoji. Gililaččat leat hui čeahpit geavahit njalbmesujiid go bohtet gávppašit Gironii go ballet koronas.
Čuohcá dikšui
Son vásiha ahte eanet gaskal 18ja 40-jahkásaš nuorat dárbbašit divššu dál ja muhtumat leat vel nuorabut.
– Eai leat goassege nu olu nuorat buohccán koronain. Min lusa bohtet beaivválaččat 4-5 olbmo geat leat hui buohccit eai ge birge ruovttus šat. Mii geahččalit gal sáddet eatnasiid ruoktot, muhto muhtimat eai birge leat ruovttus go leat nu skihpasat.
Heaggavárra
Buohccit geat bohtet Girona buohcceviesu fáhkkabuhcciid vuostáiváldimii leat hui buohccit.
– Mii fállát errenlanja gos lea vuoigŋanveahkki go koronabuohccit ieža eai nagot šat vuoigŋat. Sii lea hui heajut, hui, hui skihpasat, ja dárbbašit divššu. Seammás oaidnit ahte sis lea ballu go lea heaggavárra go eai nagot vuoigŋat ja dihtet ahte sáhttet buohccát nu olu ahte šaddet vuoigŋanmašinii, ja dat lea lossat midjiide. Mii fertet dikšut pasieantta máŋga diimmu errenlanjas ja lea lossa bargu midjiide, muitala Marainen.
Boares olbmot
Julia čilge ahte boahkuheapmi lea dagahan ahte vuorraseamos olbmot leat buorebut suddjejuvvon dál.
– Boahkuheapmi lea váikkuhan sidjiide ja jus ožžot dávdda, de eai buohccá nu garrasit. Sii birgejit dál hui bures. Muhtun boarrásat, geain leat eará dávddat, sáhttet buohccát.
Alimus logut
Girona gieldda sátnejođiheaddji Gunnar Selberg dadjá ahte Ruoŧas ja Norrbottenis leat alimus njoammunlogut olles Eurohpás dal. Girona gielda lea dál bidjan johtui heahtečoahkkima gos leat mearridan giddet buot gieldda skuvllaid gaskaboddosaččat.
– Mii giddet buot skuvllaid, sihke mánáid-, nuoraid- ja joatkkaskuvllaid ja fállat gáiddusoahpahusa boahtte vahku, dadjá son.
Njoammu nuoraid gaskkas
Selberg čilge ahte dávda njoammu nuoraid gaskkas dál.
– Girona nuorat fertejit dál veahkehit min. Logut čájehit ahte dávda njoammu eanemusat nuoraid gaskkas, 13- ja 29-jahkásaččaid gaskkas. Eará gielddain njidjet dat logut, muhto eai Gironis. Nubbi stuora joavku mas maid njoammu dávda leat nuorra ollesolbmuid gaskka, čilge son.
Ožžot divššu
Juohke vahku sáddejit maid pasieanttaid Gironis Jiellevárrái ja Bihtámii vuoigŋnanmašiinna dikšui. Leat 300 olbmo geaidda sáhttá njommon korona Gironis dušše dán vahku. Girona buohcceviesu fáhkkabuhcciid vuostáiváldima buohccedivššárjulia Marainen lohká dat leat balddihahtti logut:
– Diehtit vahku geahčen sii dárbbašit divššu min luhtte. De boahtá bárru ja mis šaddá olu bargu ja šaddat vuoruhit eret eará dikšumiid. Maŋŋá dan de leat studeanttaid skuvlaloahpaheamit dáppe, maŋŋá dan fas mihcamárat ja nu dat joatká go olbmot deaivvadit ja festejit, ja nu njoammu korona nuppiide, čilge Julia.
Heajumusat Eurohpás
Julia mielas leat buorre go leat gidden gieldda bealis skuvlla.
– Mii leat heajumusat Eurohpás dál čuovvut rávvagiid, ja lea heahpat orrut Gironis dál. Sávvamis manná boahkuheapmi dál jođáneappot vai dilli rievdá, dadjá Julia Marainen.
Norrbottena leanas leat oktiibuot 261 olbmo jápmán koronadávdii. Miessemánu 28. beaivvi ledje 38 olbmo buohcceviesus koronadávddain ja 12 vuoigŋanmašiinnas, dieđiha Regiovdna Norrbotten.