Čađahit konsearttaid Oslos ja Bergenis
Ráđđehus diktá lágideddjiid čađahit stuorebuš konsearttaid dán geasi. Ulbmil lea gávnnahit sáhttá go jođánisiskkus unnidit njoammunriskka gehččiid gaskka.
– Dutkan jođánisiskosiid beavttus sáhttá leat veahkkin kultureallima rahpamis, ja vuolgá dain evttohusain maid lean ožžon geassejoavkkus man ásahin. Prošeakta sáhttá buktit ođđa máhtu mii lea ávkkálaš nationálalaččat ja riikkaidgaskasaččat, dadjá kulturministtar Abid Raja (G) ráđđehusa preassadieđáhusas.
Lágideamit bagadallojuvvojit Álbmotdearvvašvuođainstituhtain (FHI) ja galgá leat ovttastupmi stuorra festiválain, earret eará Øyafestivalen, Bergen Live ja Palmesus.
Regionálalaš komitéa medisiinnalaš dutkanetihkas (REK) lea addán dárbbašlaš dohkkeheami čađaheamis geahččalankonsearttaid, mat plána mielde galget čađahuvvot Oslos ja Bergenis geassemánus.
Sáhttá go jođánisiskkus leat čoavddus?
Ulbmil konsearttaiguin lea gávnnahit sáhttá go jođánisiskkus unnidit njoammunleavvama gehččiid gaskkas. Prošeakta galgá čielggadit ahte njoammunleavvan sáhttá nu bures geahpeduvvot jođánisiskosiin ahte sáhttá šaddat čoavddusin stuorebuš lágidemiin.
Dál plánejuvvojit vihtta stuorebuš lágideami Osloi ja Bergenii, gos galget oktiibuot leat 15 000 oasseváldi. Dasa lassin galget eambbo go 15 000 olbmo searvat kontrollajovkui, muhto dat joavku ii galgga konsearttaide.
Guktot joavkkuid isket sihke ovdal ja maŋŋel konseartta vai sáhttet buohtastahttit joavkkuid, ja dasto gávnnahit lea go konsearttaid dihte lassánan njoammunriska.
Gilvu oažžut saji
Oasseváldit dán dutkanprošeavttas galget leat gaskkal 18 ja 45 jagi.
FHI fágadirektevrra, Atle Fretheim, muitala dat áidna eaktu oassálastit lea ahte ii leat boahkuhuvvon ja ii leat riskajoavkkuin. Son jáhkká ahte šaddá gilvu searvamis prošektii.
Ráđđehus spiehkasta covid-19 njuolggadusain, earret eará gáibádus doalahit ovtta mehtera gaska ja gáibádus ahte alkohola dušše guossohuvvo beavddi lusa.