HEAJOS diehtojuohkin HÁRDÁ
Deanu gielddas leat ássit geat orrot uđasbáikki duohken ja sii dárbbašit fanasjođu jus galget beassat bargui dahje oahppit beassat skuvlii. Golbmii lea Snelandia kanselleren fanasjođu ja álbmot uđasbáikki duohken leat reageren go ii leat doarvái buorre diehtojuohkin.
Deanu gieldda sátnejođiheaddji Helga Pedersen reagere garrasit go Romssa ja Finnmárkku fylkkagielda ii dieđit buori áiggis go fanasjohtu meaddil uđasbáikki Gállošgohpis Ráttovuonas ii mana. Mannan vahkus ii mannan fanas gaskavahku 26. beaivvi ja duorastaga 27. beaivvi, dán vahku ii mannan vuossárgga 31. beaivvi ge fanas nu go galggai. Dasa reagere Deanu sátnejođiheaddji Helga Pedersen.
– Fatnasa teknihkalaš váttisvuođaide ii leat nu olu maid sáhttá dahkat, muhto dat mii geavai mannan vahkus lei okta plánejuvvon divvun ja ledjen sávvan ahte livččiimet ožžon buori áiggis dieđu. Lea dat masa mun reageren. Mun lean váldán oktavuođa fylkkagielddain ahte sii fertejit buoridit diehtojuohkima vai olbmot dihtet dan, dadjá Pedersen.
Ii leat álki
Vuossárgga šattai Deanu sátnejođiheaddji vuot bargat ruovttokantuvrras Deanodagas, muhto son lohká ahte leat máŋgasat geat orrot uđasbáikki duohken geain ii leat seamma vejolašvuohta.
– Mus gal lea vejolaš bargat ruovttokantuvrras ja mánáin lei ruovttuskuvla, muhto dán bealde uđasbáikki leat olbmot geain lea turnusbargu, geain leat šiehtadusat buohcciviesuin, doavtterkantuvrras, iige leat nu álki daid rievdadit go dieđihuvvo beaivvilahki ovdal, dadjá sátnejođiheaddji.
Ii leat dohkálaš
Sátnejođiheaddji dáhttu fylkkagieldda dieđihišgoahtit buori áiggis vai olbmot uđđasa duohken sáhttet plánet iežaset árgabeaivvi.
– Ievttá kansellerema birra oaččuimet dieđu sotnabeaivvi eahkedis, ja mun ožžon dan dieđu muhtin eará olbmos gii lei čuvvon fatnasa. Dat gal ii leat dohkálaš, deattuha Deanu gieldda sátnejođiheaddji Helga Pedersen.
Diehtojuohkin dehálaš
Romssa ja Finnmárkku fylkkagielda Nuorta-finnmárkku johtolaga ossodatjođiheaddji Ole Håkon Haraldstad lohká dás lea sáhka teknihkalaš divvumiin go fanas ii leat leamaš johtolagas. Son deattuha ahte fylkkagildii lea dehálaš ahte mátkkošteaddjit ožžot dieđu.
– Lea issoras dehálaš ahte diehtojuohkin doaibmá, erenomážit sidjiide geat leat geainnu haga. Mii fertet iskat mii lea geavvan siskkáldasat ja mii fertet dieđihit operatevrii ahte diehtojuohkin ferte almmuhuvvot doarvái bures, ja dát guoská buot fatnasiidda mat leat johtolagas, loahpaha ossodatjođiheaddji Ole Håkon Haraldstad.