– ISSORAS, muhto maiddái somá fárret
Guovdageainnu mánáidskuvla lea dáid beivviid fárreme nuoraidskuvlla vistái. 6A klássa lea bargan fárrenproseassain giđđadálvvi rájes.
FÁRREME: Buohkat klássas galget iežaset diŋggaid doalvut ođđa klássalatnji. Kine Isabel ja Ellen Inger guoddiba veahkkálaga beavddi. Govven: Iselin Skum
OLLU BARGU: Ine Biret ja Emma Julianne lohkaba ollu barggu fárremiin, muhto illudeaba dassážii go gerget. – Lea veaháš ártet ja váivi, muhto somá maid, dadjá Ine Biret. Govven: Iselin Skum
Skábet gurrejuvvojit ja boares govat bohtet oidnosii. Hildut čorgejuvvojit, ja báhpirat ja girjjit sirrejuvvojit. Seinniin váldojit govat, plakáhtat ja eará barggut vulos.
– Gos dat gássa masa eaŋgalasgielatgirjjit galget, jearrá oahpaheaddji Inga Gunhild Kemi.
Guovdageainnu skuvlla 6A klássa lea ráhkkaneame sirdit mánáidskuvlla visttis nuoraidskuvlla vistái. Moatti beaivvis galgá klássa čorgen ja sirdán visot diŋggaid, stuoluid ja bevddiid ođđa klássalatnjii. Bevddiid ja stuoluid galget oahppit ieža guoddit.
Guokte jagi ovddosguvlui galget buot mánáidskuvlla klássat leat dálá nuoraidskuvlla visttis, dassážii go ođđa skuvla lea gárvvis.
– Mun vieččan ruskaseahkaid. Girjjit maidda ii leat čállojuvvon, daid bidjabehtet dán gássii.
Oahpaheaddjiguovttos Inga Gunhild ja Camilla bagadallaba ohppiid movt ja gosa diŋggat galget. Juohke gássii čállojuvvo makkár sisdoallu das lea.
– Allet fal bálkes boares govaid, daid lea somá vurkkodit ja geahččat fas go rávásmuvvabehtet, lohká veahkkeoahpaheaddji Camilla Nystad Solberg.
Illudit fárret
Oahppit Emma Julianne O. Eira, Kine Isabell Haetta Gaup, Ine Biret Gaup ja Elen Inger M. Gaup illudit buohkat fárret ođđa vistái ja klássalatnjii, muhto lea juoga maid Emma Julianne sávvá ain beassat joatkit, vaikko vel fárrejit ge.
– Mun sávan mii ain beassat bingenis čiekčat, go dan mii dahkat measta juohke friddjagoartilis.
Ellen Inger mielas lea earenoamáš beassat vásihit juoidá maid earát eai leat beassan vásihit.
– Dat ii dáhpáhuva dávjá ahte beassá fárret eará vistái go ođđa skuvla galgá huksejuvvot. Mu eadni ja ahčči eaba leat beassan dovdat movt dat lea fárret ođđa skuvlii, ja dat lea hui gelddolaš, muitala Ellen Inger ja lohká maid alcces badjánit olu dovddut fárrema oktavuođas.
– Lea veaháš váivi ja ártet go galget gaikkodit skuvlla, go mun han lean vázzán dáppe dan rájes go álgen skuvlii. Muhto seammás lea somá.