Issoras go smávva báikkis gávdnui narkotihkkavuorká
Mannan vahkku, bearjadaga miessemánu 28. beaivvi, čálii Finnmárkku politiijaguovlu preassadieđáhusas ahte muhtin tuvravázzi lei gávdnan narkotihkkavuorkká «Museavuovddis», Kárášjogas. Preassadieđáhusas bivddii Siri Ulverud, leansmánni Porsáŋggu leansmánniguovllus, cavgilemiid álbmogis dán áššái. Preassadieđáhusas muitaluvvui ahte vuorká lea sáddejuvvon analyseremii, ja Ulverud dajai ahte dat vuorká mii gávdnui ii sáhte leat jurddašuvvon dušše iežas geavaheapmái. Ulverud ii sáhte dadjat ahte Kárášjogas duođaštuvvo eambbo narkotihkkageavaheapmi go eará guovlluin ge.
Dat lea issoras go smávva báikkis gávdno nu ollu narkotihkka ahte politiijat gohčodit dan vuorkán, mii ii sáhte jurddašuvvon dušše «iežas atnui». Dat dieđus mearkkaša ahte dat gávdnon narkotihkka lea jurddašuvvon vuovdima várás. Ii leat ge amas ášši ahte narkotihkkageavaheapmi lea laskan maiddái smávva báikkiin, erenoamážit garra narkotihkkasorta nu go ovdamearkka dihte amfetamiidna. Dat ii leat šat dušše stuorra gávpogiid váttisvuohta.
Danne sávvat ahte Kárášjogas leat olbmot geat sáhttet veahkehit politiijaid gávdnat olbmo dahje olbmuid geat ledje čiehkan narkotihka Museavuovdái.
Narkotihkka lea servodatváttisvuohta mainna dán áigge bártidit measta juohke sajis, ja lea dávjá sosiála dáhpáhusaid oktavuođas ahte politiijat duoguštit narkotihkaid. Narkotihkkavuorká mii gávdnui Kárášjogas lea vuot muittuhus dasa man dehálaš lea doaimmahit narkotihka easttadanbargguid, vai narkotihkka ii leavašii čihkosis.
Danne sávvat ahte Kárášjogas leat olbmot geat sáhttet veahkehit politiijaid gávdnat olbmo dahje olbmuid geat ledje čiehkan narkotihka Museavuovdái. Dákkár olbmuid lea hirbmat dehálaš gávdnat, vai eai beasa gilvit narkotihka servodagas. Politiijain lea jávohisgeatnegasvuohta ja cavgilemiid sáhttá maid anonymiseret, jus dan háliida. Narkotihkkageavaheapmi ja gávppašeapmi dáhpáhuvvá diehttelasat čiegusvuođas, muhto rabasvuohta dan birra sáhttá leat mielde gavdnjemis gávppašeddjiid dobbeliidda, jus ii juo áibbas eret.
Servodat ferte garrasit bargagoahtit nuoraiguin, vai eai sorrošii narkotihkkii. Das ii gávdno eahpádus ahte smávva báikkiin maid gávdno narkotihkka váttisvuohta, vaikko eai soaitte oidnot nárkogeavaheaddjit luoddaguorain ja párkkain. Nárkogeavaheapmi ja gávppašeapmi dáidá dáhpáhuvvat hui čihkosis. Danin lea ge dehálaš ahte olbmot čájehit vuostehágu mirkkuide ja eai bala muitaleames dan birra.