Aiddái somá fárret
Ine Biret lohká maid gelddolažžan fárret ođđa vistái, muhto lohká iežas jáhkkit veaháš váillahit boares klássalanja.
– Lea veaháš váivi ja ártet, muhto somá maid, dadjá Ine Biret.
Govven olles skuvlla
6A lea ráhkkanišgoahtán fárremii giđđadálvvi rájes juo. Oahpaheaddji Inga Gunhild muitala mánáin lei hállu idjadit skuvllas ovdal go galge fárret, ja nu sii plánegohte ulbmila idjademiin. Fáddá šattai dokumenteren.
6A klássa lea dáinna fáttáin govven ja dokumenteren buot lanjaid olles skuvlavisttis. Eahkedis besse oahppit mannat miehtá skuvlla.
– Mun lean govven skuvlašillju, guhkes feaskára ja viessohoaiddáriid kantuvrra luhtte. Mii govvimet ipadaiguin ja dat lei hui somá mu mielas, muitala Emma Julianne.
– Mun lean govven lanjaid ja heaissaid. Lea dehálaš dokumenteret vai mis leat muittut maid beassat vurket, dadjá Ellen Inger.
– Mun háliidan muitit makkár dát skuvla lei, lohká Ine Biret.
– Gávnnaidet go makkárge lanja dahje eará maid ehpet diehtán gávdno?
– Mun gávdnen bassiidlanja, gos ledje dievva bassandiŋggat, muitala Ellen Inger.
– Mun maid gávdnen bassiidlanja. Mun rahpen uvssa gealláris ja doppe lei stuora latnja gos dievva bassandiŋggat, dadjá Kine Isabel.
– Mun gávdnen gealláris ovtta tráhppa ja feaskára mii manai girjerádjosa guvlui. Lei veaháš issoras, ja Inga Gunhild álggii biškut vai mii galggaimet ballat, boagusta Ine Biret.
– Mii leimmet máŋgii juo fitnan gealláris. Mun áigon čiehkádit, muhto in mun ollen, bohkosa oahpaheaddji Inga Gunhild.
Ollu galgá bálkestuvvot
Oahpaheaddjiguovttos Inga Gunhild ja Camilla muitaleaba čorgenbarggu váldit sullii guokte beaivvi.
– Mis lea hui guovddážis dat ahte oahppit galget oahppat ovttasbargat. Munnje lei maid dehálaš ahte oahppit leat mielde olles fárrenproseassas, ja nu lean jurddašan iešguđetge beliid váldit mielde oahpahussii. Dainna lágiin bođii jurdda maiddái govvet ja dokumenteret olles skuvlla.
Čorgema oktavuođas leat iešguđegelágan fágalaš fáttát leamaš. Go boares girjjiid galge bálkut de lei seammás lávvu fáttán.
– Mii bálkkuimet nu hirbmat eatnat girjjiid girjerádjosis, muhto čuohpaimet muhtun ráje girjjiin ja hábmiimet lávuid dain. Dan oktavuođas guoskkaheimmet maiddái matematihkkafágii.
Dopme vuojadanhállas fitnat
Idjadeami oktavuođas lei dehálaš sihke oahpaheaddjái ja ohppiide fitnat ja geavahit áiggi ovtta ossodagas ovdal dan giddejit.
– Okta ulbmil lei govvet, vurkendihte govaid. Nubbi lei ollet vel vuojadit skuvlla vuojadanhállas ovdal dan giddejit, muitala Kemi.
Vaikko lea imáš fárret, de lohká oahpaheaddji vuogasin maid oažžut ođđa klássalanja.
– Dán klássalanjas lea nu heitot áibmu, dan eat gal boađe váillahit. Muhto seammás dat ii leat eará go latnja. Min fokus lea čađaáigge ahte mii ieža, olbmot dan lanjas, ráhkadit dan klássa.
Stuorámus rievdadusat
Moatti beaivvis galgá klássa leat gearggus joatkit oahpahusa eará visttis ja eará klássalanjas. Skuvlajagis leat ain moadde vahkku ovdal luopmu álgá.
– Stuorámus rievdadus, ja maid mun balan go dál fárret, lea jus mii eat oaččo távvala doarvái jođánit bajás. Nubbi lea maid ahte mii fárret njuolga čihččet klássa klássalatnjii, vaikko dát klássa rievttimielde ii leat čihččet klássas ovdal čavčča rájes. Muhto mii illudit, lohká Inga Gunhild Kemi.