– «Stunta» mii ii leat goassege čađahuvvon
NRK Sámi Juŋká-gánddat váldet «Olles Norga vuodjá» hástalusa eará dássái.
Norgga vuodjansearvvi dutkamis čájehuvvo ahte Norgga 10-jahkásaččat leat čuorbbimus vuodjamis buot davvi riikkain. Dan oktavuođas lea Norgga vuodjansearvi ovttas Gádjunfitnodagain ja NRK:IN searvan «Olles Norga vuodjá» prošektii mii galgá čalmmustahttit dan heaggadárbbašlaš máhtu. Sii hástalit olles Norgga searvat ja govddodit čázis golbma minuhta lávvordaga geassemánu 5.beaivvi gaskkal diibmu 13:37 ja 13:40.
Váldet hástalusa eará dássái
NRK Sámi Juŋká gánddat Jon Henrik Hivand, Anders Nils Gaup ja Ole Mathis Nedrejord leat váldán hástalusa eará dássái. Sii áigot doallat govddodanšovva Dievaljávrris ja leat ožžon veahki Eurohpa watercross-meašštiris Joachim Olsenis čađahit dan.
– Mii áigut čađahit «stuntta» mii ii leat goassege čađahuvvon, muitala Nedrejord.
Leaikkas duođalašvuhtii
Preassadieđáhusas čuožžu ahte Juŋká gánddat galget juoga ládje govddodit Olsena muohtaskohtera maŋis go son vuodjá.
– Leimmet bargočoahkkimis hállamin duššiid go buvttiimet jurdaga, muhto go leaika váldui duođas de eat sáhttán šat geassádit, muitala Nedrejord.
– Miellagiddevaš oaidnit movt manná
Ávvir lea jearran Juŋkká gánddain maid sii jurddašit dutkanbohtosiid birra.
– Lea suddu ahte lea nu, muhto buorre go mis Kárášjogas lea buorre vuojadanfálaldat, čeahpes hárjeheaddjit ja fiinna vuojadanhálla, dadjá Nedrejord.
Juŋkká-gánddain lea guovttelágan oaidnu vuodjamii, Hivand ja Gaup gal lohkaba máhttit vuodjat ja oadjebasat čázis. Goalmmát juŋkká-gánda, Nedrejord, ges ii loga iežas áibbas oadjebas čázis.
– In dieđe vuos movt boahtá mannat, šaddá miellagiddevaš oaidnit, dadjá Nedrejord. Vuosttaš háve njuolggosátta Juŋká-gánddat buvttadit dábálaččat filmmaid sin Youtube kanálii ja NRK TV neahttasiidui, muh
to dál debuterejit njuolggosáddagiin NRK1:S.
–Jáhkán manná hui bures, go mis lea čeahpes bargojoavku, HMS vásttolaš ja buot lea bures plánejuvvon, dadjá Hivand.
Hástalus čađahuvvo njuolggosáddagis NRK1:S lávvordaga diibmu 19:50 ja sátta leat dárogillii.
Kárášjoga vuodjansearvi maid oassálastá
Nuorat Kárášjoga vuodjansearvvis maid áigot oassálastit Juŋká šovvii. Duorastaga sii deaivvadit Dievaljávrris gos galget ovdagihtii filbmet go dánsot čázis. Sihkarvuođa dihte eai sáhte skohteriin oktanaga čázis lávvardaga.
Kárášjoga vuodjansearvvi stivrrajođiheaddji Katri Mortelmans Somby oaivvilda ahte lea surgat go Norgga mánát leat čuorbbimusaid searvvis vuojadeamis.
– Kárášjogas lihkus lea buoret dilli. Ferten rámidit Doris Norbye go lea buori barggu dahkan ja áŋgiruššan dan ovdii ahte Kárášjoga mánáide lea buorre vuojadanfálaldat, dadjá stivrrajođiheaddji.
Doris Norbye maid dadjá Kárášjogas buoret dili go eará báikkiin Norggas.
– Measta buot mánát Kárášjogas máhttet vuodjat, go sis lea vuojadeapmi 1.luohká rájes skuvllas ja go Kárášjogas leat buori vuojadanfálaldagat astoáiggis, dadjá Norbye.