Árvvoštallet ásahit báikkálaš doaibmabijuid
Romssas registrerejedje mannan vahkkus 23 ođđa koronanjoammuma. Jus eai nákce bissehit koronaleavvama, de šaddet giddet servodaga ja ásahit báikkálaš doaibmabijuid.
Romssa gávpogis leavvá koronavirus. Mannan duorastaga duođaštuvvui koronavirus 17 olbmos ja dássážii ledje registreren guhtta ođđa njoammuma.
– Duođaštuvvui korona máŋgga studeanttas geat barget Driv nammasaš studeantaolgobáikkis. Dasa lassin duođaštuvvui koronavirus muhtin russas. Koronanjoammuma studeanttaid birrasis lea vejolaš čatnat njoammumii mii dál dáhpáhuvvá Romssas, muhto russa njoammuma eat leat vel nagodan guorrat, lohká Romssa njoammuneastadandoavttir Trond Brattland.
Romssa suohkan lei odne maid bovden preassakonferánsii gos njoammuneastadandoavttir dajai ahte lea hástaleaddji go koronavirus leavvagoahtá nuoraid ja studeanttaid birrasiin.
Sáhttá njoammut viidát
– Studeanttat leat sosiála ja sii orrot dávjá ovttas olu eará olbmuiguin, dat dagaha ahte sáhttet njoammut koronavirusa viidát, lohká Brattland ja joatká.
– Šaddá stuora váttisvuohtan jus korona leavvá russaid birrasis. Oaidnit man viidát koronanjoammun lea leavvan russaid searvvis eará suohkaniin. Danin lea vejolaš ahte koronavirus dál leavvá viidát dáppe Romssas.
Doaibmabijut
Romssa suohkanis rabai duorastaga goalmmát iskanbáikki ja ávžžuhit buohkaid čađahit iskkadeami jus sis leat dávdamearkkat.
– Jus eat nagot koronanjoammuma bissehit Tisk-vugiin, mii mielddisbuktá iskama, isolerema, njoammunguorrama ja errema, de fertet ásahit báikkálaš doaibmabijuid. Mii leat jo plánen čoahkkima Álbmotdearvvašvuođainstituhtain vai ovttas beassat ráhkadit plána, lohká Romssa njoammuneastadandoavttir Trond Brattland.
Leavvan iešguđetge birrasiidda
Koronavirus mii dál leavvá Romssas lea bieđganan iešguđetge birrasiidda. Maŋimuš jándora lea ovtta russas Sállir joatkkaskuvllas duođaštuvvon koronavirus ja Sállira nuoraidskuvlla leat gidden maŋŋel go muhtin oahppis čájehuvvui leat koronavirus.
Koronanjoammun váikkuha garrasit Norgga árktalaš universitehtii go buot logi Driv bargi leat sin studeanttat, dasa lassin galgá maiddái muhtin universitehtabargái njommon koronavirus.
Koronavirus lea maid duođaštuvvon njeallje «Tide buss» bussevuoddjis ja golbma eará bargis seamma fitnodagas.