– Lea surgat go dakkár dáhpáhusat DÁHPÁHUVVET
Ánnejoga biilalihkohisvuođas duššai okta olmmoš.
Sihke buokčit ja helikopterat ledje mielde ohcamin biilla mii gárttai johkii Ánnejogas, Nuorta-finnmárkkus bearjadaga. Báikkis, šalddi buohta Ánnejogas, lea hirbmat rávdnji ja heahteveahkit ádjánedje gávdnat biilla.
Diibmu 13.08 dieđihit Finnmárkku politiijat ahte biila, mas olmmoš lei, gávdnui rukku vuolde Ánnejogas ja ahte okta olmmoš gávdnui duššan.
Politiijat dieđihit ahte duššan olmmoš lea vuorrasit dievdoolmmoš. Buot heahteveahkit ledje báikkis ja Várggáin bođii vel gádjunfanas.
– Suorggatlaš
Ávvir deaivvada Lill Mette Lienain, gii lea eret Ánnejogas, lihkohisvuođabáikkis. Son ii loga muitit šalddi bokte ovdal leamaš lihkohisvuođa, muhto muitá moatti jagi áigi go nuorat vudje merrii ja dušše.
– Go dakkár dáhpáhusat dáhpáhuvvet, de lea duođaid surgat ja suorggatlaš, dadjá Lien.
Son muitala maid ahte su telefovdna lea čuodjan ja olbmot leat jearahan sus lea go son leamaš lihkohisvuođas.
Okta olmmoš
Politiijait báikkis duođaštedje Ávvirii ahte lea sáhka ovtta olbmos.
– Mis lea diehtu ahte lea sáhka ovtta olbmos eaige mis leat ákkat navdit ahte leat eambbogat leamaš biillas, muitalii bearjadaga Kim Pleym, gii jođiha politiijaid báikkis.
Biila gávdnui rukku vuolde ja Pleym muitala Ávvirii ahte čáhci báikkis lea hui moivvas ja danne ádjánedje maid guhká gávdnat biilla.
Pleym ii loga diehtit man čieŋal báikkis lea, muhto muitala ahte mearas lea ulli ja danne lea eambbo čáhci.
– Čázevuole rávnnjit vel dagahedje ohcanbarggu váddáseabbon, nu ahte bukčiin báikkis ii lean álkes bargu odne, dadjá Pleym.