Bovde searvat ÁSSANMOKTAVAHKKUI
Finnmárkku spábbačiekčanbiire bovde Guovdageainnu álbmoga searvat ássanmoktavahkkui mii lágiduvvo geassemánu 7. – 10.beaivvi.
Guovdageainnu ássanmoktakomitea jođiheaddji, Maia Haetta, sávvá ahte buohkat ožžot mielde dáhpáhusaid mat leat álggus vahkku juo.
– Sávan álbmot juogaládje oažžu mielde lágidemiid dán vahkkoloahpa juo, vuoi mii beassat bures álggahit vahkku mánnodaga, iđitborramušain Báktehárjjis, dadjá Haetta.
Maŋidii doaluid
Guovdageainnus galggai diibmá juo leat ássanmoktavahkku, muhto go pandemiija bođii de fertii maŋiduvvot. Ávvir lea jearran Haettas jáhkká go ahte korona boahtá váikkuhit olbmuid searvanmoktii.
– Soaitá maid nu ahte mii oažžut lassi «boosta» go leamaš nu jaskat guhkitáigge. Olbmuin soaitá miella searvat rabas lágideapmái dál go viimmat juoga dáhpáhuvva, dadjá Haetta.
Jođiheaddji jáhkká olbmuid searvat go viimmat lea juoga masa sáhttet searvat.
– Muhtumat soitet háliidit oaidnit mii dat lea prošeavttaid, ja earát ges soitet boahtit geahččat čuovvut go mii njoammuneastadan njuolggadusaid, dadjá Haetta ja boagusta.
Nu go son lea ipmirdan, de leat olusat Guovdageainnus boahkuhuvvon ollásit. Guovdageainnus lea maid dán rádjai leamaš hui unnán koronanjoammun.
– Sihkarvuođa dihte fertet doalahit gaskkaid ja jus ii vejolaš, de geavahit njálbmesuoji. Leat sihkkarit hui olusat geat liikká eai háliidivčče searvat masage, muhto dan han gal ferte dohkkehit, dadjá Haetta.
Háliida nuoraid searvat
Vuossárgga lea earret eará iđitborramuš Báktehárjjis ja nuoraidčoahkkin Sámi joatkka- ja boazodoaloskuvllas.
– Sávan ahte nuorat háliidit leat mielde váikkuheame Guovdageainnu boahtteáiggi ja ahte eai atte buot fámu boaraniidda. Dat livčče veahá vaivi, dadjá Haetta.
Buorre ássanmokta Guovdageainnus
Ássanmoktakomitea jođiheaddji ii jáhke Guovdageainnus ássanmokta váttisvuohtan.
– Mii eat leat vásihan ahte olbmot fárrejit eret dáppe dan sivas go eai loavtte, muhto eat leat vásihan dan ge ahte olbmot šávihit deike, dadjá Haetta.
Son lea bargan eará ássangeasuhan prošeavttain gos leamaš digaštallan manne Guovdageaidnu galgá leat sadji gos ássá, ja movt galget oažžut ođđa olbmuid ásaiduvvat dohko.
– Mii háliidit ahte olbmuin galgá leat hállu Guovdageainnus bargagoahtit, studeret ja vaikko vel ásaiduvvat deike. Lea veahá hástalus oažžut ođđa ássiid ásaiduvvat ja dovdat ahte dá lea sin ruoktu, muitala Haetta.