Nuorat dárbbašit VÁHNEMA GUHTE MUITALA RÁJÁID
Dál go lea beaivvádat ja liehmu, de lassána maid festen nuoraid gaskka. Av-og-til alkovett nammasaš organisašuvnna jođiheaddjis, Randi Hagen Eriksrudas, lea čielga ávžžuhus váhnemiidda: Leage váhnen ja dieđit!
– Mannan jahki leamaš hui gáibideaddji olusiidda, erenoamážit nuoraide. Guhkes čuvges geasseijat giktalit nuoraid. Seammás diehtit ahte go nuorat ja vuolleahkásaččat deaivvadit, de juhket olu alkohola. Váhnen eastada juhkama buoremusat, lohká Av-og-til searvvi váldočálli Randi Hagen Eriksrud preassadieđáhusas.
Son muitala iežas healkkehan go oinnii Ipsos varas iskosa mas čájehuvvui ahte golmmas logi olbmos Tromssas ja Finnmárkkus leat oaidnán vuolleahkásaččaid juhkame báikkálaš doaluin dahje feasttain maŋimuš guokte jagi.
Vihtta rávvaga Tromssa ja Finnmárkku váhnemiidda:
Háleš nuorain. Dieđit čielgasit mii lea ortnegis ja mii ii leat, de juhket sávvamis uhcit alkohola go dat earát. Vaikko don attašit alkohola, de it galgga navdit ahte don liikká dieđát man olu dat nuorra gánda dahje nieida juhka dan eahkeda. Nuorra olbmot juhket dan maid ožžon váhnemiin ja velá dan maid earáin ožžot. Gulahala eará váhnemiiguin. Háleštehpet makkár njuolggadusat din mielas galggašedje gustot din nuoraide luohkás dahje lagasbirrasis. Fála maid doalvut ja viežžat nuoraid, nu ahte dieđát gos sii leat ja geainna sii leat fárrolaga.
Leage váhnen nuoraide
– Mii diehtit veahkaválddálašvuohta, sávakeahtes sex ja lihkohisvuođat lassánit hirbmadit go nuorat festejit ja juhket alkohola. Maŋimuš áiggi leat nuorat gávdnan molssaevttolaš festenbáikkiid njoammueastadannjuolggadusaid dihtii. Mánát leat váhnemiid ovddasvástádus. Ávžžuhus váhnemiidda: Dieđit. Vaikko ii oro nu, de guldalit nuorat eanemusat váhnemiid go šaddá sáhka alkohola birra, deattuha Av-og-til searvvi váldočálli Randi Hagen Eriksrud.
Son deattuha ahte nuorat geat gullet ruovttuin čielga alkoholageavahan njuolggadusaid, eai juhkagoađe nu árrat go earát seamma agis.
– Eai nuorat dárbbaš du skihpárin. Sii dárbbašit váhnema gii muitala gokko rádjá manná. Ádden ahte lea váttis, muhto fertet duostat dieđihit, lohká Eriksrud.