OLLES SERVODAGAS LEA ovddasvástádus eastadit jugešvuođa nuoraid gaskkas
Ipsos varas iskkadeapmi čájeha ahte golmmas logi olbmos Romssas ja Finnmárkkus leat oaidnán vuolleahkásaččaid juhkame báikkálaš doaluin dahje feasttain maŋimuš guovtti jagis. Av-og-til alkovett nammasaš organisašuvnna jođiheaddjis, Randi Hagen Eriksrudas, lea čielga ávžžuhus váhnemiidda, ahte sii fertejit čielgasat das mii lea ortnegis ja mii ii leat. Dieđus lea dehálaš ahte váhnemat nevvodit iežaset mánáid rievttes geainnuid ala vai eai sorbmahuva alkoholii.
Seammás lea seamma stuora ovddasvástádus servodagas, nu go ovdamearkka dihte ahte boarrásat nuorat eai oastte dahje atte alkohola vuolleahkásaš nuoraide. Seamma dehálaš lea dat, ahte rámbuvrrat ja olgobáikkit leat hui dárkilat dainna ahte eai vuovdde alkohola vuolleahkásaččaide. Ovdal leat iskkadeamit čájehan ahte dat geavvá maid dávjá. Ii ge leat ge amas ášši, ahte alkohola olis gevvet veahkaválddálašvuođat ja sávakeahtes sex. Lihkohisvuođat maiddái lassánit hirbmadit go nuorat juhket alkohola. Dálá dilis maiddái leat nuorat gávdnan molssaevttolaš festenbáikkiid, ja lea ge čájehuvvon ahte dain feasttain lea máŋgii álggahuvvon servodagas koronanjoammun.
Dálá dilis maiddái leat nuorat gávdnan molssaevttolaš festenbáikkiid, ja lea ge čájehuvvon ahte dain feasttain lea máŋgii álggahuvvon servodagas koronanjoammun.
Lea ge maid issoras smiehttat dan birra, ahte muhtun nuorat álget hui nuorran máistit alkoholajuhkosiid. Skuvllas, dearvvašvuođabálvalusas ja ruovttus fertejit hupmagoahtit nuoraiguin alkoholajuhkama birra. Lea maiddái váralaš juhkagoahtit alkohola beare nuorran. Eai leat ge duššiid dihte biddjon ahkemearit alkoholajuhkosiidda, go 16-jahkásačča rumaš ja vuoiŋŋamaččat eai leat ollesšattus vel. Danne gierdá ollu heajubut alkohola go rávisolmmoš. Dasa lassin lea maid dan láhkái, ahte mađi nuorabun álgá juhkat alkohola, dađi álkibut darvána alkoholaváttisvuođaide. Dakkár váralašvuođaid dihte lea ge ollu riikkain biddjon vuolemus ahkemearri alkoholavuovdimii, namalassii 18-jahkásaš ahkemearri oastit juhkosiid main lea alkohola vuollel 22 vol. proseantta ja badjel dan ii leat lohpi oastit ovdal go lea deavdán 20 jagi. Dakkár beliid birra han orru maid dárbu hupmat rahpasit.
Politihkkarat maiddái fertejit šaddat čeahpibun nuoraid fálaldagaid doalahit vaikke suohkanis lea heajos ruhtadilli. Leat nu dávjá oaidnán ahte nuoraid fálaldagat ovddemuš sihkestit eret bušeahtain go šaddet seastigoahtit. Jáhkkit hui dehálažžan ahte buot suohkaniin leat viiddis ja govda astoáigefálaldagat nuoraide, go joavdelasvuohta maŋŋelgaskabeivviid ja vahkkoloahpaid sáhttá šaddat njuolggogeaidnun jugešvuhtii.