NVE LEA KÁRTEN man olu dárbu lea Norggas eastadit dulvvi ja uđđasa
Norgga čázádat- ja energiijadirektoráhtta (NVE) lea ovdánahttán ođđa vuogi mo árvvoštallá man olu dárbu oktiibuot lea eastadit viesuid maid uđđasat ja dulvvit uhkidit.
– Mis lea dál buoret vuolggasadji árvvoštallat man stuorra dárbu Norggas lea oktiibuot kártet ja eastadit dulvvi ja uđđasiid guovlluin gos olbmot ásset. Vuohki dahje metodihkka ii atte vuođu árvvoštallat eaŋkilprošeavttaid, muhto lea dattetge dehálaš oažžun dihtii oppalaš gova. Mis ii leamaš ovddežis dakkár oppalaš govva, lohká Norgga čázádat-a ja energiijadirektoráhta (NVE) direktevra Kjetil Lund preassadieđáhusas.
Almmuha raportta
Bargu kártet dárbbu álggahuvvui 2019:s ja lea organiserejuvvon Nve-prošeaktan 2020:s, mii gohčoduvvo «Flom og skred – sikringsbehov for eksisterende bebyggelse (FOSS)» dahje «Dulvi ja uđas – dálá ássanviesuid sihkkarastindárbu». Das čilgejuvvo metodihkka mo sáhttá analyseret servodaga dárbbu sihkkarastit dálá viesuid dulvvi ja uđđasa vuostá. Dan metodihka vuođul lea maid sihkkarastindárbu dulvvi ja uđđasa vuostá Norggas analyserejuvvon gitta jagi 2100 rádjái, oppalaččat, iige eaŋkiláššiid.
Sihkkarastindárbu oktiibuot
Analysa čájeha ahte mávssášii birrasii 86 miljárdda kruvnna sihkkarastit buot viesuid mat leat uhkiduvvon ceakko eatnamiin dulvvi, eanaborrama ja vujohatláirrá, jus daid galggašii sihkkarastit seamma dássái go ođđa viesuid (TEK17) gáibádussii. Uhcimus árvvoštallan lea oktiibuot 50 miljárdda ja bajimus fas 120 miljárdda kruvnna.
– Ii várra leat nu jierbmái servodagas buot daid sihkkarastindoaimmaid čađahit. Ferte jearrat man olu ruhta galgá geavahuvvot ja mo servodat vuoruha, lohká Lund.
Dan analysas eai leat mielde dálá astoáigeviesut, geainnut, ruovdemáđijat ja eará almmolaš infrastruktuvra, iige leat mielde jus várri luoitá ja uđas fierrala, eaige dulvebarut ja garra biekkat.