VÁLDÁN ISKOSIID
buot soalddáhiin
Ruovttusuodjalus lea ge dan vahkkus čađahan hárjehallama. Disdaga bohte soalddáhat sihke Guovdageainnus, Kárášjogas ja Álttás.
Ruovttusuodjalusa gulahallanolmmoš, Korporála Jonny Karlsen, duođaštii disdaga Ávvirii ahte lea duođaštuvvon guoktásis korona.
– Guoktásis duođaštuvvui korona go leigga váldán jođánisiskosa. Soai leaba Álttás boahtán fárrolaga ovttain biillain. Min iskosat váldojedje sudnos go čohkkáiga biillas. Sudnos ii leat oktavuohta leamašan eará soalddáhiiguin go joavddaiga Guovdageidnui. Dan olis mii leat mearridan ahte mii sáddet buot 15 Áltái gullevaš soalddáha fas Áltái, ja mii váldit iskosiid buot soalddáhiin dál, maid Guovdageainnu ja Kárášjohka gullevaš soalddáhiin, muitala Karlsen.
Iskan buot soalddáhiid
Gaskavahkku iđida dieđihii suodjalus ahte eai leat gávdnan eambbo soalddáhiin korona maŋŋel go leat iskan buohkaid.
– Mii joatkit Hv-hárjehallamiin mas leat mielde 60 olbmo, eanaš sis leat eret Kárášjogas ja Guovdageainnus.
Ruovttusuodjalusa gulahallanolmmoš, Jonny Karlsen, ii sáhtán disdaga muitalit ahte leaba go dat guokte soalddáha bisánan goste ge dan rájes go vuoddjáifa Álttás.
– Mis eai leat dieđut dan birra, ja lea juoga man njaommunguorranjoavku ferte gávnnahit, ahte geaiguin sudnos lea oktavuohta leamašan go leaba Álttás leamašan ja maid dan gaskkas leaba bargan go vuoddjáiga Álttás gitta bođiiga min iskanstašuvdnii, lohká Karlsen.
Eai doaimmat jođus
Guovdageainnu sátnejođiheaddji, Hans Isak Olsen, muitala ahte sii leat ožžon dieđu ja sii leat dárkkistan ahte lea go dárbu bidjat doaimmaid Guovdageainnus johtui.
– Dán rádjái mii leat árvvoštallan ahte ii leat dárbu makkárge doaimmaid bidjat johtui, na goit daid dieđuid vuođul maid mii leat ožžon dán rádjái, lohká son.
– Dát čájeha ahte njoammuneastadeapmi lea doaibman bures go nu johtilit nagodedje gávnnahit ahte lea korona sudnos, ovdal go lea leamašan oktavuohta eará soalddáhiiguin.