ÁVVUDII riegádanbeaivvi ovttas olles giliin
Karen Johanne Eira beasai iežas 14-jagi beaivvi ávvudit ovttas giliolbmuiguin, go juste su riegádanbeaivvi deaivvai ássanmoktaprošeavtta olis oktasaš boradeapmi Mázes.
Dán vahkku lea Guovdageainnus ássanmoktavahkku, prošeakta maid dárogillii leat gohčodan «Jakten på bolyst». Dan oktavuođas leat ovttat doalut Máze gilis maid; oktasaš boradeapmi buot giliolbmuide.
Karen Johanne ja su skuvlaoappát leat doaluin ja sis leat veaháš sierra ávvudoalut vel iežaset beavdde birra.
– Mus lea odne riegádanbeaivi, muitalastá gávccát luohká oahppi Karen Johanne Eira ja mojohallá go jearralan iigo leat somá olles giliin ávvudit beaivvi.
Son ja eará Máze skuvlla oahppit leat ge ovttas giliolbmuiguin boradeame gaskabeaiborramuša maid Finnmárkku spábbačiekčanbiirre lea ordnen sidjiide.
– Čájehit dan buori mii gilážiin lea
– Mii háliidit čájehit mii ássanmokta lea, olbmot galget beassat illudit masa nu, vásihit juoidá ovttas ja fuomášit dan buori mii buot báikkiin lea, lohká Finnmárkku spáppačiekčanbiirre beaivválaš jođiheaddji Roger Finjord.
(Ášši joatká diehtorámma vuolábealde)
Finnmárkku spábbačiekčanbiire ovttasbargá báikkálaš servviiguin ja suohkaniiguin go lágidit ássanmoktaprošeavttaid báikkiin. Mázes ovttasbarget Máze skuvllain.
– Mii háliidit ahte suohkanat ja álbmot galget beassat čájehit buot dan buori mii sin báikkiin lea ja ieža maid fuobmát man olu buorre lagasbirrasis lea. Mii lávet lohkat ahte lea dehálaš ahte gilážiin leat viesuin čuovggat, muhto seamma dehálaš lea ahte viesuid gaskkas maiddái leat čuovggat. Dainna oaivvildan ahte leat doalut ja doaimmat mat čohkkejit olbmuid, čilge Finjord.
– Deháleappot go suohkanekonomiija
Finjord lohká ge iežaset hui duđavažžan go Mázes maid serve nu olu olbmot oktasaš boradeapmái. Son muittuha vel ahte gaskavahkku lea sis deaivvadeapmi suohkana áŋggirdeddjiiguin, servviid jođiheddjiiguin ja earáiguin geat servet eaktodáhtolašbargguide.
– Dohko leat maiddái Máze servviid jođiheaddjit bovdejuvvon ja doppe ožžot vejolašvuođa muitalit sin doaimmaid ja dárbbuid birra, muitala Finjord ja rámida dan barggu maid eaktodáhtolaččat barget báikkálaš dásis:
– Láven lohkat ahte áŋggirdeaddjit, sii geat barget eaktodáhtolaččat valáštallanservviin ja eará servviin, leat deháleappot go suohkanekonomiija.
– Ii galggašii geassebáikin šaddat
Kirsten Berit Haetta ja Klemet J.O. Haetta illudeaba maid go giliolbmot besset deaivvadit:
– Dákkár doalut leat suohttasat, eai leat nu olu čoagganeamit mis dáppe. Hupmat ássanmovtta birra lea dehálaš. Jáhkán gal ahte dat geat juo orrot dáppe loktet bures. Lea eanet hástalus oažžut olbmuid fárret deike. Skuvla lea áitojuvvon ja mánnábearrašat eai bisán deike. Mii dárbbašit movttidahttima ja mun oaivvildan ahte dan dáfus sáhtášii suohkan olu eambbo bargat. Suohkan ferte buorebut láhčit dili vai min nuorat sáhtáše bisánit Mázii, earret eará ordnet viessosajiid vuoi nuorat besset deike hukset, lohká Risten Biret, geas lea okta sávaldat:
– Máze ii galggašii šaddat dušše geassegillin gosa olbmot bohtet luomuid áigge. Suohkan ferte láhčit buoret vejolašvuođaid. Min nuorat háliidivčče ruovttubáikái, muhto ii leat nu álki go eai leat bargosajit ja viessosajit, lohká Kirsten Berit Haetta.