Fefo stivra almmuhii čiegus dieđuid dáhpedorpmis
Finnmárkkuopmodaga (Fefo) stivra galggai gitta čoahkkimis meannudit Finnmark Kraft AS ášši, muhto dáhpedorpmis muitaledje ášši birra rabas mikrofuvnnas.
Fefo lágidii maŋŋebárgga stivračoahkkima ja čoahkkima lei vejolaš čuovvut streamema bokte. Stivračoahkkima áššelisttus lei earret Finnmark Kraft AS ášši. Ášši digaštallan galggai gittauvssaid duohken go galge meannudit Fefo ja Finnmark Kraft AS ossosiid vuovdima. Dađi bahábut ledje vajáldahttán jáddadit mikrofovnna ja oassi áššis almmuhuvvui almmolašvuhtii.
Ášši
Čakčamánu 19. beaivvi jagi 2019:s mearridii Finnmárkkuopmodaga (Fefo) stivra ahte Finnmark Kraft AS ossosat galget vuvdot. Vuovdima oktavuođas lea Fefo almmuhan opšuvdnašiehtadusa, mii vuolláičállui geassemánus jagi 2009.
Fefo lea Finnmark Kraft AS oasseeaiggát, ja eaiggáduššá 12,5 proseantta fitnodagas. 2010:s čálle Fefo ja Finnmark Kraft AS opšuvdnašiehtadusa, mas Finnmark Kraft AS oažžu ovdamunnevuoigatvuođa ovddidit biegga- ja smávvačáhcefápmodoaimmahagaid Fefo eatnamiin. Finnmark Kraft AS ruovttusiiddus leat logenáre smávvačáhcefápmorusttega plánejuvvon, lassin bieggamilloprošeavttaide.
Meaddin
Lei Fefo jurista Håvard Aagesen guhte boastut rabas mikrofovnnas ribahii hállat oanehaččat diehtojuohkima birra. Das bođi ovdan earret ahte Fefo direktevrra ávžžuhus lea ahte eai vuovdal Finnmark Kraft AS ossosiid. Ágga lea earret eará ahte Fefos lea buoret badjelgeahčču sisabahkkemiidda mat leat Finnmárkkus, erenomážit boazodoalu dihte. Son maid ávžžuhii stivrra geahčadit beliid jus mearridit vuovdit ossosiid, earret fallat ossosiid dálá eaiggádiidda.
Fefo stivrajođiheaddji Kurt Wikan lohká Ávvirii ahte diehtu mii bođii ovdan lei meaddin sin bealis, ja ášši ii livčče galgan boahtit almmolašvuhtii.
– Dat ii galgan almmolašvuhtii vuos, go eat leat vel geargan áššiin. Dat lea meaddin min bealis, dadjá Wikan.
Mearridan
Stivradigaštallan ii geavvan rabas mikrofovnna ovddas, muhto go meaddin vuos geavai, de Wikan muitala ahte Fefo stivra lea mearridan čuovvulit direktevrra ávžžuhusa.
– Nu lea mearrádus dál vuos, ja lei ovtta jienalaš stivra mii mearridii dan. In muital dađi eanet, go mii eat leat geargan vel áššiin. Formálalaš bealit galget sadjái vel, muhto mearrádus lea dahkkon, dadjá Wikan.
Ártet
Finnmark Kraft AS stivrajođiheaddji Per-erik Ramstad lei čoahkkima jođiheaddji ja lohká oanehaččat ahte lei ártet go árvvoštalle vuovdit juoidá man ieža leat leamaš njunnošis ásaheamis.
– Dieđus lea buorre go leat dan mearridan, muhto ii leat lunddolaš munnje kommenteret mo eaiggádat galget dahkat. Vuvdet go vai eai, dat ferte leat sin duohken. Muhto lea imaš leamaš go árvvoštalle vuovdit, go ieža leat leamaš njunnošis ásahit Finnmark Kraft, dadjá Ramstad.