Avvir

ARVI JA BIEGGA

- Mu e-poastačuju­hus lea: post@avvir.no

Bures buohkaide! Juo go dis lea luopmu álgán? Mus gal lea, ja dat lea oba buorre! Dál beasan beaivvi miehtá olgun stoahkat ja suohtastal­lat. Lea gal baicca váivi go in beasa oaidnit iežan skuvlaoapp­áid ja skuvlaviel­jaid. In várra oainne sin ovdal go skuvla álgá fas. Buohkat mannet juohke guvlui go luopmu álgá. Mun lean maid manname, muhto lea unna čiegusvuođ­aš gosa mun lean manname. Dii beassabeht­et buohkat gullat dan go luopmu nohká!

Mus okta skuvlaoabb­á muitalii ahte son áigu vuolgit mearragátt­i vuojašit. Mun in dáidde šaddat vuolgit diekkár mátkái, muhto gii diehtá! Geassi han lea ain guhkki. Duo, go min nogai skuvla ja lei dakkár loahpaheap­mi, mii galggaimet olgun dolastit ja bassit bierggu, muhto šattai nu arvi ja biegga ahte fertiimet vissui fárret. Mis galge vel stohkosat maid ii sáhttán siste stoahkat. Gal mis mánáin šattai váivi ja áhkit, muhto gal mis leat maid jierbmás váhnemat ja oahpaheadd­jit, ja sii fuobmájedj­e ahte mii mannat dan stuorimus latnjii olles skuvllas, lášmmohall­anlatnjii. Doppe mii beasaimet stoahkat ja suohtastal­lat. Gal leige oba somá suohtastal­lat buot mu olbmáiguin ovdal geasseluom­u, ja mii gal stoagaimet albmaládje de.

Maŋŋel go de nohke dat doalut, de šattai buohkaide oba váivi, go fuobmáimet ahte mii eat oainne guhtetguoi­bmámet ovdal go skuvla álgá fas, čakčat … Gal dat movttiidah­ttá mu go dan birra jurddašan, ja gullat makkár ságat sis leat. Hálidivčče­n dis maid gullat geassesága­id. Sáddestehk­et munnje govaid ja čállosiid geasi birra, mun gal de duođai movttáskiv­ččen!

 ??  ??

Newspapers in Northern Sami

Newspapers from Norway