– Dát lea issoras VÁTTES JA LOSSA ÁŠŠI
Kárášjoga sátnejođiheaddji Svein Atle Somby lohká gieldda fertet čielggadit diggegotti eahpádusaid lágamánnerievttis.
Kárášjoga gielddastivra mearridii duorastaga geassemánu 16. beaivvi guoddalit duomu man Sis- ja Nuorta-finnmárkku diggegoddi celkkii Arnar Jørgensen Vuolab áššis.
«Gielddastivra guoddala lágamánneriektái duomu man Sis-finnmárkku diggegoddi lea cealkán. Gielddastivra árvvoštallá ahte leat máŋga beali duomus mat sáhttet addit vuođu guoddalit. Čujuhat erenomážit ahte diggegottis lea eahpádus sin konklušuvnna ektui.»
Geahččalit diggegotti duomu
Kárášjoga sátnejođiheaddji Svein Atle Somby lohká ahte go gielddastivra lea mearridan guoddalit ášši, de sii háliidit geahččalit iešguđetge beliid ja eahpádusaid lágamánnerievttis. Son deattuha ahte dán áššis ii leat eahpádus ahte Arnar lea vásihan givssideami Kárášjoga vuođđoskuvllas.
– Dat lea issoras váttes ja lossa ášši. Dán áššis ledje máŋga beali mat dahke ahte gielddastivra mearridii guoddalit. Go diggegoddi orru čujuheamen eahpesihkarvuođa iežaset konklušuvdnii, de dat dahká dan ahte mii guoddalit. Duomus lea eahpádus das geas lea ovddasvástádus, lea go dušše min gieldda duohken, dadjá Kárášjoga sátnejođiheaddji Svein Atle Somby.
Makkár gáibádusat
Kárášjoga gieldda advokáhtta, Agnetha Johansen Åsheim, ii háliit čiekŋudit makkár beliid gielddastivra čujuha iežaset mearrádusas.
– Mun in háliit kommenteret daid beliid, go dat bealit bohtet ovdan go mii geargat čállit iežamet guoddaleami, lohká Åsheim.
Advokáhtta čujuha dasa ahte oažžut duomu geahččaluvvot lea mielde čielggadit makkár gáibádusat gielddas leat givssidanáššiin.
– Diggegoddi lea čájehan eahpádusa konklušuvnnaide ja dat lea juoidá maid mii leat digaštallan guoddaleami ektui, dadjá Agnetha Johansen Åsheim ja čujuha ahte Kárášjoga gielda ii sáhte okto váldit buhtadusovddasvástádusa dán áššis.
Eahpečielga momeanta
Dás beasat lohkat oasi Arnar Jørgensen Vuolab ášši duomus ja das boahtá ovdan ahte gielddas lea eahpečielga momeanta man gielda dál háliida geahččalit lágamánnerievttis.
«Riekti vuođđuda skuvlagivssideapmi leamaš mearkkašahtti sivvan vahágii ahte lea lunddolaš čatnat buhtadusovddasvástádusa dasa.
Kárášjoga gielda lea subsidiáralaččat čujuhan ahte ovddasvástádus ferte juhkkojuvvot guovtti gieldda gaskka, ja ahte Kárášjohka galgá dušše dubmejuvvot máksit sin beali váhágis.
Jus vuođđoduvvo ahte dás lea sáhka guovtti vahátáššis, dahje unnimusat ahte lea belohahkii vuosttaš sivalaš gos lea vahát manifesterjuvvon, de sáhttá váldit atnui differánsaprinsihpa mas nubbi sivalaš dušše dubmehallá máksit iežas oasi vahágis.
Riekti oaivvilda almmatge ahte dás lea sáhka seamma vahágis. Dat lea dasa lassin váttis vaháguvvamii duođaštit makkár bealit vahágis leat sivvan dan guovtti gielddas. Diggegoddi oaivvilda ahte lea sii geain lea ovddasvástáduseavttuid vuođul lea dagahan riska gillájeaddjái, gii dál ferte čuožžut solidáralaš ovddasvástideaddjin gillájeaddjái.»
Duopmu čujuha ahte gielda berre beassat eret
Dás beasat lohkat oasi Sis- ja Nuorta-finnmárkku diggegotti duomus mas sii čujuhit ahte Kárášjoga gielda berre beassat eret buhtadusovddasvástádusas.
«Áššečuoččuheaddji lea ollislaččat vuoitán ášši. Ášši lea leamaš prinsihpalaš dan geažil go dat lea guoskan máŋgga gažaldah
kii givssideami ovddasvástádusas go dat lea geavvan máŋgga sajis, ja go das leat maid eará vejolaš sivvafáktorat. Riekti lea eahpidan lea go das leamaš ávvirmeahttunvuohta. Kárášjoga gielddas lea danne leamaš buorre ágga oažžut ášši geahččaluvvot. Beliid givrodatdilli čájeha ahte gielda berrešii buhtadit áššegoluid, muhto váldo vuhtii ahte áššečuoččuheaddji lea ožžon nuvttá áššejođiheami, ja son oažžu gokčojuvvot eanas iežas goluin. Kárášjoga gildii lea das okta momeanta ahte ii sáhte hilgut ahte gielddas lea eahpečielga solidáraovddasvástádus Gáivuona suohkaniin. Riekti oaivvilda dan geažil ahte gielda berre beassat eret buhtadusovddasvástádusas, riidolága § 20-2(3) vuođul.»
– Váivves ášši Arnarii
Arnar Vuolab Jørgensena advokáhtta, Arvid Kjaervik, lohká dál sii fertejit ráhkkanit vuolgit ođđasit diggái ja leat gergosat fas deaivvadit lágemánnerievttis.
– Lea stuorra noađđi sutnje vuolgit ođđasit diggái dáinna áššiin. Ferten dadjat ahte mun in lean jáhkkán sin guoddalit duomu, muhto go dahke dan, de fertet mii dušše ráhkkanit ja leat gergosat dasa, loahpaha advokáhtta Arvid Kjaervik.