– MEARKABEAIVI eamiálbmogiidda
Canada lea geassemánu 21.beaivvi dohkkehan ON eamiálbmot julggaštusa. UIT professora mielas lea dá stuorra mearkabeaivi eamiálbmogiidda miehtá máilmmi.
UIT Norgga árktalaš universitehta juridihka fakultehta professor, Øyvind Ravna, lea maid jođiheaddji sámi-ja eamiálbmogarievtti dutkanjoavkkus. Son lohká dát lea illusáhka.
– Dát lea illusáhka jus geahččá olmmošvuoigatvuođa ja eamiálbmotvuoigatvuođaid bealis. Dat lea maiddái fuomášuhtti ahte Canada lea dat riika mii vurddii guhkimus ovdal dohkkehedje eamiálbmot julggaštusa. Dál implementerejit føderála dásis njuolgga Canada láhkii, mii dagaha ahte julggaštus rievttalaččat geatnegahttá buot provinssaid Canadas, dadjá professor Øyvind Ravna.
Duorastat eahket bođii diehtu ahte leat gávdnon 761 olbmo dákterikkit, eanaš mánáin. Dat gávdnojedje namakeahttá hávddiin ovddeš internáhtaskuvllas Canadas, dan dieđiha eamiálbmotjoavkku jođiheaddji Cadmus Delorme, ođasfitnodahkii AFP.
Bázahusat gávdnojedje Saskatchewan nammasaš báikkis, mii lea olggobealde Marieval Indian Residential School.
Moadde vahkku dás ovdal dieđihuvvui ges ahte ledje gávdnan 215 dákterikki mánáin. Sii ledje hávdáduvvon namakeahtes hávddiide olggobealde Kamloops Indian Residential skuvllas, British Columbia provinssas.
Mearkabeaivi eamiálbmogiidda
Canada dohkkehii geassemánu 21.beaivve ON julggaštusa ja eamiálbmoga lága. Ulbmil dáinna lágain lea dáhkidit julggaštusa Canada lágain ja addit rámmavuogádaga Canada ráđđehussii ollašuhttit julggaštusa hástalusaid. Dát láhka geatnegahttá earret eará ministariid ovttasbargat eamiálbmogiin go ráhkadit ja implementerejit doaibmaplánaid, vuoi olahit mihttuid julggaštusas.
– Geassemánu 21. beaivi šaddá mearkabeaivin eamiálbmogiidda miehtá máilmmi. Dat bidja maid deattu Norgii, go sii orrot vajálduhttan man olu návccaid sii bidje oažžun dihte julggaštusa dohkkehuvvot ON:S, oaivvilda Ravna.
Addá mearkkašumi juridihkkii
Son čujuha láhkii maid Canada lea dohkkehan ja dadjá ahte julggaštus šaddá dego universála olmmošvuoigatvuođa gaskaoapmi.
Dat mielddisbuktá ahte juridihkkii maid čadno geatnegasvuohta, beroškeahttá leat go stáhtat ratifiseren ja daguhan lága nationála láhkan.
– Dat dahká ahte alimusriektái dahje Norgga eiseválddiide šaddá váttis hilgut eamiálbmot julggaštusa, vaikke leat ovdalaččas dohkkehan Ilo-konvenšuvnna. Dát láhka boahtá addit mearkkašumi juridihkkii. Dál lea vuos dát láhka illusáhkan Canada eamiálbmogiidda, geat leat gillán mealgat eanet go mii dáppe Norggas, loahpaha UIT juridihka fakultehta professor Øyvind Ravna.