Romsalaččat ja finnmárkulaččat ođđet beare unnán
Šearbmageavaheapmi, hušša, idjaborran ja anašeapmi leat moadde siva dasa manne Romssa ja Finnmárkku olbmot ođđet beare unnán.
Juohke nubbi romsalaš ja finnmárkulaš vásiha bare unnán oađđán árgabeaivvis. Dan čájeha jearahallaniskkadeapmi man Herbalife Nutrition lea čađhan.
Iskkadeapmi čájeha ahte vihtta olbmo logi olbmos ođđet vuollel čieža diimmu juohke ija. Goalmmadasoassi Romssa ja Finnmárkku fylkka ássiin ođđet unnán miehtá bargovahkku, ja dárbbašit oađđit guhkit ja eambbo go vahkkoloahppa boahtá. Lea sihke hušša ja šearbmageavaheapmi mii váikkuha heajos ja unnán oađđimii.
Lea vel okta joavku mii rahčá ollu oađđimiin. Namalassii nu gohčoduvvon B-olbmot. 55 proseantta dain olbmuin geat ieža lohket sii leat B-olbmot, dovdet iežaset álohii veaháš dahje beare váibbasin.
– Mii geat bargat nagirfáttáin lávet dadjat ahte leat doarvái oađđán go dovddat iežat vuoŋisin nuppi beaivvi, it ge dárbbaš geavahit goanstaávdnasiid nu movt gáfe. Jus dárbbašat logi gáfegohpu iđđes ovdal go nagodat bargagoahtit, de lea vuorjašuhtti, dadjá nagirekspearta, doavttir ja girječálli Harald Hrubos-strøm preassadieđáhusas.
Herbalife Nutrition iskkadeapmi čájeha ahte njeallje olbmo logi olbmos Romssas ja Finnmárkkus leat B-olbmot. Golbma olbmo logi olbmos leat A-olbmot ja reasta álbmot eai gula goabbáge jovkui. Lea stuora erohus A-olbmuin ja B-olbmuin.
– Nationála logut čájehit ahte A-olbmot leat vuokŋáseaappot , hárjehallet eambbo ja borret eambbo dearvvašlaš biepmuid go B-olbmot. Juohke goalmmát A-olmmoš oaivvilda B-olbmuid láikin dahje koffeidna-sorjavaš olmmožin geain lea váttis vuostálastit geahččalusaid, lohká Herbalife Nutrition Davviriikkaid hoavda Mia Bergmann.
– Dasa lassin oaivvilda juohke njealját A-olmmoš ahte B-olbmot leat čuorbbit plánet.
Maiddái A-olbmot erdojit B-olbmuid geažil. Guhtta B-olbmo,10 B-olbmos oaivvildit ahte A-olbmot leat beare movttegat iđđedis.
Iskkadeapmi čájeha viidáseappot ahte leat máŋga iešguđetlágan siva manne fylkka álbmot eai oađe nu ollu go galget.
Okta olmmoš njealji olbmos, Romssas ja Finnmárkkus, borrá idjabiepmu oktii dahje moddii vahkkui. Juohke viđat fylkka ássi mieđiha maid ahte son lohká iežas sihke nohkkat ja lihkkat árabut go dan maid rievtti mielde dahká, go muitala oađđindábiid birra earáide.
40 proseantta sis geat bártidit nahkáriiguin lohket šearbmageavaheapmi, nu go telefovnnas dahje TV:S, lea sivvan manne eai oađe doarvái. Dasa lassin lohket 10 proseantta Romssa ja Finnmárkku fylkka álbmogis ahte anašeapmi eahkedis váikkuha dasa man ollu ihkku šaddá oađđit.