Lohpiduvvon «helvet»fálesnuoris boahtá beare maŋŋit

Mihcamareahkeda ceggejedje vuosttaš lávuid Máregohppái, Riehpovutnii. Luondu ja nuorat luondduorganisašuvdna lea ásahan vuostálastinakšuvnna Fálesnuorrái ja sin ulbmil lea fáktet guovllu ja bissehit ruvkefitnodaga mašiinnaid boahtimis.

Guokte jagi dás ovdal lohpidii ge searvvi dalá jođiheaddji Gaute Eiterjord ahte sii ráhkadit «helveha» ruvkedoaimma dihte, sii giddejit iežaset láhkiide ja akšunerejit ruvkebáikkis. Lagabui 3500 olbmo dieđihedje ahte áigot leat mielde siviila jeagohisvuođas.

Olbmot geat gullet sihke luonddugáhttenservviide, Fiettar orohahkii ja maid báikkálaš olbmot leat čoahkkanan Máregohppái dáid beivviid. Luondu ja nuorat áigot čájehit man viiddis doarjja sis lea iešguđet birrasiin vuostálastit Riehpovuona ruvkedoaimma. Muhto mii dađi bahábut ballat ahte dál lea beare maŋŋit. Mii leat ovdal ge oaidnán ahte go stuora servodaga eiseválddit mearridit juoidá, de ii leat šat ávki vuosttaldit. Ii leat go moadde mánu gollan dan rájes go muhtin miellačájeheaddjit geahččaledje bissehit vuovdečuollamiid Bájila suohkanis, Paharovas, Ruoŧa beale Sámis. Dalle oinniimet maid filmmaid go politiijaveagat bohte báikái ja fámuin bissehedje miellačájeheddjiid. Seamma boahtá dáhpáhuvvat Máregohpis, Riehpovuonas, Norgga beale Sámis maid.

Go čielggai ahte Ealáhusdepartemeanta attii Nussir ASA ruvkefitnodahkii doaibmalobi Riehpovuona ruvkedoibmii 2019:s, de oaččui Luonddugáhttenlihttu hirbmat ollu ođđa miellahtuid moatti beaivvis. Dađi bahábut lea dan rájes gollan ollu áigi ja mis lea maid máilmmis pandemiija jođus mii bisseha vejolašvuođaid čohkket duháhiid mielde miellačájeheddjiid. Dat boahtá dál váikkuhit dasa ahte mii eat gula olus miellačájeheddjiin ja Nussir ruvkedoaibma álggahuvvo nu go lea plánejuvvon. Dađi bahábut ballat ahte vuoittáhallet fas sámiid rievttit ja árbevirolaš ealáhusat stuora servodaga eiseválddiide.

Dađi bahábut vuoittáhallet fas Sámiid rievttit ja árbevirolaš ealáhusat stuora servodaga eiseválddiide.