Girječálli Sigbjørn Skåden oažžu dán jagáš bargostipeandda
DAVVI-NORGA: 100.000 ruvdnosaš bargostipeanda juolluduvvo jahkásaččat Davvi-norgga čáppagirjjálašvuođa girječállái. Guokte davimus fylkagielddat juhket dán bálkkašumi.
Lea njealját jahki stipeanda juolluduvvo, ja dán jagi bohte oktiibuot logi ohcamuša. Jus ohcamuš galgá árvvoštallojuvvot, de ferte girječálli sáddet oasáža buktagis mainna lea bargamin, dan dieđiha fylkkagielda sin preassadieđáhusas.
Romssa ja Finnmárkku fylkkagieldda ja Nordlándda fylkkasuohkana fágajury lea árvvoštallan buot mánusčállosiid mat bohte sisa, ja sii eai eahpit ge ahte Sigbjørn Skådena ođđa romána šaddá erenomáš.
Jury árvvoštallan
Fágajurys ledje UIT Norgga árktalaš universitehta girječállioahpu fágalaš jođiheaddji Anne Oterholm, Forfattersentrum:s Cecilie Løveid ja Romssa ja Finnmárkku fylkkagieldda fylkkagirjerájushoavda Birgit Larsen. Sii čállet čuovvovaččat iežaset árvvoštallamis:
«Skåden čállá sámegillii. Bargonamahus álggahuvvon buktagis lea Lánttedievvá dahje dárogillii Planterhaug, doppe gos Skåden ieš lea eret. Jury dadjá ahte go ledje lohkan muhtin oasi, de ovtta ravkaleamis sirdašuvve krimrománas boasttupolitihkalaš satiirii, dahje lohká go aitosaš allegoriija, jerret sii. Dat ahte romána orru sisttisdoallamin máŋga šáŋŋera lea boktán jury sáhkkiivuođa. Sii imaštallet guđe univearssas dát dáhpáhuvvá? Lea go realisma?»
Jury cealká ahte dá ii leat dábálaš romána. Romána diktá doaimmaid ja váttisvuođačuolmmaid sámi identitehta ektui dáhpáhuvvat áibbas konkrehta guovllus.