Ođđa lávlla olmmáivuođa birra
Ville Söderbaum almmuha «Song to my friends» nammasaš lávlaga Jan Ole Kristenseniin fárrolaga.
Ruoŧŧelaš Ville Söderbaum almmuha ođđa lávlaga mii lea oassin su boahttevaš «Attrakšuvdna» nammasaš skearrus. Skearru lea Norgga Sámediggi ruhtadan.
Söderbaum lea lávlu, lávllačálli ja čuojaha saksofovnna. Son lea Uppsalas eret, ja orru Guovdageainnus.
Lávlla gaskkusta dan birra ahte movt čájehit olmmáivuođa guoskkaldahttima bokte, ja ráhkaduvvui máŋga jagi áigi, muhto almmuhuvvo áiggis goas guoskkaldahttin lea ožžon ođđa mearkkašumi.
– «Song to my friends» čállen áigodagas go ožžon vuorddekeahtes guoskama oalggi vuostá. Mun dovden ahte dat guoskkaldat lei dehálaš munnje dien dilálašvuođas. Vássán jagis sáhttá dan lávlaga dulkot ođđasit, riggodagain ja miellagiddevašvuođain, muhto maiddái moalkásvuođain. Dat lávlla sáhttá veahkehit min ain gávdnat vugiid movt guoskkaldahttit nubbi nuppi, čállojuvvo preassadieđáhusas.
Lávlagis gullo maiddái Jan Ole Kristensen sihke lávluma ja gitáračuojaheami bokte.
Musihkkabuvttadeaddji Bernt Mikkel Rieban Haglund lea buvttadan lávlaga, ja lávlaga musihkkavideo lea Kolombia almmái Andres Elzaar rešisseren.