Manahii NM pokála
Bivdo- ja guolástansearvi lea lágidan Jegertrap 2021 norggameašttirgilvvuid leairaduvvábáhčimis, gos earret eará Per Johnny Sara geahččalii olahit vuosttaš saji.
– Mu mielas lea somá báhčit, ja mun lean báhčán goit dál nuppelot jagi. Dát lea vuosttaš geardde go mun bessen mielde norggameašttirgilvofinálii, muitala Per Johnny Sara.
Son dadjá ahte lei veaháš láittas massit pokálasaji, muhto lea duhtavaš 4. sajiin goitge.
– Mun gal lean hui duhtavaš, dat geat ledje ovddabeale leat buori báhččit, muhto finála lea finála ja vaikko mii mii sáhttá dáhpáhuvvat. Vuosttaš geardde medden ja nu in deaivan. Bissu beaškkehii ovdal go ollejin dollet bissu leairaduvvá guvlui, ja mun ieš veahá suorganin go bávkkehii muhto ii dat ábut. Mun ledjen veaháš balus ja dán vuoru ii lean mus nu lihkku, dadjá son.
Son muitala iežas gávnnahan ahte lea buoremus váldit gulul go báhčá, ja jos ii lihkostuva, na de ii lihkostuva.
Somá báhčit
– Báhčin gal lei hui somá, ja mun dihten ahte ledjen guokte čuoggá maŋábeale dan gii lei ovddemusas, ja ledje viđas geain lei okta duvvá mu ovddabeale. Mun dihten ahte mun ferten deaivat jos galggan mielde leat viidáset, muitala Sara.
Son dadjá ahte lei nubbin maŋimuš joavkkus, ja áidna báhčči su joavkkus gii devddii 25 čuoggá.
– Maŋimuš joavkkus gahčče olusat eret gilvvus, muhto lei junior báhčči gii vuittii gonagaspokála. Mis lei ođđasit báhčin gos leimmet njeallje báhčči geat gilvaleimmet silba- ja bronsamedáljas. Bážiimet álggos 10 látta. Mun ribahin goalmmát látta ja maŋimuš pláhtas ovtta. 10 láttas in deaivan guokte látta ja nu šadden njealjádin norggameašttirgilvvuin, dadjá Sara.
Gilvalan vilbeale vuostá
Su vilbealli, guovdageaidnulaš Klemet Anders Sara lei maid gilvvuin ja olahii 15. saji.
– Lei hui somá gilvalit vilbeliin. Son šattai ovddit jagi norggameašttirgilvvu Nordisk Trap meašttirin. Mun dihten son lea čeahpes báhčči, ja oidnen son ii deaivan vuosttaš láttain ja oidnen ahte de son ii birgen. Dasa lassin son ii deaivan vel guvttiin eará láttain ja gártai nu 15. sadjái, dadjá Sara.
Son muitala ahte livčče somá šaddat norggameašttirin.
– Livčče dieđusge, boahtte jagi lea ođđa áigodat, ja sávvamis olmmoš háhppeha ráhkkanit bures dasa. Borgemánu viđát beaivvi lágiduvvojit Nordisk Trap Nm-gilvvut, muhto mun lean dieđihan iežan eret gilvvuin go ii heiven searvat dán jagi. Dál mun gal válddán geasseluomu. Leamaš olu báhčin dán giđa, measta juohke vahkkoloahpa leamaš báhčin cuoŋománu loahpa rájes ja dássážii, dál šaddá buorre veahá bosihit, dadjá Sara.
Martin Røsaker Skien báhčinjoavkkus šattai NM meašttirin.