CUIGGODA eiseválddiid garrasit
Romssa ja Finnmárkku fylkkaráđijođiheaddji Bjørn Inge Mo moaitá Norgga eiseválddiid go nu hejot hálddašit ruoššaluosaid mat dál leat leavvame davimus guovlluin.
Romssa ja Finnmárkku fylkkaráđijođiheaddji Bjørn Inge Mo (Bargiidbellodat) cuiggoda sihke guolástusministara ja birasgáhttenministara go nu hejot hálddašit ruoššaluosaid mat dál leat leavvame davimus Norgga vuonain ja mat dál lea gorgŋemin jogaide gođđat.
Mannan vahkus, ovtta beaivvis, čogge eaktodáhtolaš bargit Ánnejogas Nuorta-finnmárkkus badjel duhát ruoššaluosa dahje Jaskesábiluosa (latiinnagillii: Oncorhynchus gorbuscha). Dán luosa eat háliit iežamet jogaide go dat áitá dábálaš Atlantaábi luosa (latiinnagillii: salmo salar).
– Ferten rámiidit buot báikkálaš bivdo- ja guolástanservviid. Giitu buohkaide geat servet eaktodáhtolaš bargui bivdit eret ruoššaluosa jogain. Muhto ná han ii galgga Norga doaimmahit guolástushálddašeami, lohká Romssa ja Finnmárkku bajimuš politihkalaš jođiheaddji, Bjørn Inge Mo, preassadieđáhusas.
Dihte ruoššaluosa leavvama birra
Romssa ja Finnmárkku fylkkaráđijođiheaddji Bjørn Inge Mo moaitá sihke dálkkádat- ja birasgáhttenministara Svein Rotevatn ja guolástusministara Odd Emil Ingebrigtsena go eaba leat dohppen ášši áigemunil, vaikko livččiiga berren diehtit ruoššaluossa juohke nuppi jagi gorgŋe jogaide gođđat.
– Juohke nuppi jagi šávihit mearehis olu ruoššaluosat min vuonaide ja jogaide gođđat. Jagi 2019 gorgŋejedje dievva ruoššaluosat jogaide. Dán jagi lea dilli velá vearrát. Lea logakeahtes ruoššaluossa mii dál bahkke jogaide. Dasa lassin čákŋet dan moatti mearraluossaguolásteaddji gáidanuohti sisa mielahis olu ruoššaluossa, lohká Bjørn Inge Mo.
Ii nagot caggat eaktodáhtolašvuođain
Romssa ja Finnmárkku fylkkaráđijođiheaddji Bjørn Inge Mo diehtá sihke guolástusministtar Ingebrigtsen ja birasgáhttenministtar Rotevatn leaba fitnan Finnmárkkus mannan vahkus ja leaba beassan valjis gullat ruoššaluosa leavvama birra.
– Gulan soai leaba juolludan ruđaid báikkálaš doaimmaide eastadan dihte ruoššaluosa leavvama, muhto mu mielas ii leat sudno hálddašanvuohki dohkálaš. Soai vuordiba ahte olbmot eaktodáhtos servet bivdit ruoššaluosa, mii lea nálli man Norga lea mearridan ii galgga leavvat riikka čázádagaide. Mu mielas lea menddo heittot, juolludit moadde šlántte čoavdit dákkár váttisvuođa. Lea nationála geatnegasvuohta dán ášši čoavdit, loahpaha Romssa ja Finnmárkku fylkkaráđijođiheaddji Bjørn Inge Mo.
Vástádus ádjána
Ávvir lea bivdán dálkkádat- ja birasgáhttenministara Svein Rotevatn ja guolástusministara Odd Emil Ingebrigtsena kommenteret Bjørn Inge Mo cuiggodeami.
Dálkkádat ja birasgáhttendepartemeanttas dieđihit birasgáhttenministtar Svein Rotevatn lea Hardangerduoddaris almmolaš mátkkis ja geahččala vástidit nu jođánit go vejolaš. Guolástusdepartemeanttas vástidit ahte Odd Emil Ingebrigtsen ferte heivehit vástádusa Rotevatn vástádusa mielde. Ávvir čuovvola ášši.