Vuoitán ovtta nuppi bálkkašumi
Gjert Rognli govat leat vuoitán iešguđetge bálkkašumiid Moscow International Foto Awards doaluin Ruoššas, ja aiddobáliid lea son vuoitán bálkkašumiid earret eará Stuora-británnias.
– Dál han lea covid-19, nu ahte lea leamašan veadjemeahttun mátkkoštit. Buot dat lea digitála vásáhus, go lea unnán maid sáhttá bargat. Oažžu e-poastta mas lea diploma ja vel oažžu ruhtavuoittu. In leat goassege daid čájálmasain go lea váttis dáid áiggiid, muitala Gjert Rognli.
Rognli dadjá ahte lea hui hearvái go leat liikon govaide, ja su mielas lea buorre gullat, go lea bargan nu guhká ja geavahan olu navccaid ráhkadit dáid buktagiid.
– Go áigu oassálastit de ohcá iešguđetge dehálaš filbma- ja govvafestiválaide miehtá máilmmi. De gilvala máŋggaid duháhiid eará dáiddáriiguin miehtá máilmmi. De ohcá festiválaide mat leat stuorámusat ja leat dehálaš festiválat. Go vuoitá doppe bálkkašumi, de lea sihkkarastán kvalitehtasteampala, dadjá Rognli.
Rukses muorra
– Govva mas lea rukses muorra lea váldon historjjálaš guovllus Sámi oktavuođas. Duogábealde muora lea Čáhput-guovlu, ja maŋŋel go leat dáistalan eaiggáduššanvuoigatvuođa Čáhpuhis, de vuittii álbmot sámi márkanis Olmmáivákkis stáhta vuostá 2001:s, dadjá Rognli.
Son dadjá ahte Alimusrievtti duopmu konkluderii ahte Olmmáivákki álbmogis lea sihke geavahanriekti ja eaiggáduššanvuoigatvuohta guovllus.
– Dát govva šattai dehálaš oassin prošeavttas mas geavahin olu referánssaid mearrasámi historjjás ja iežan duogážis Gáivuonas, dadjá son.
Viežžan inspirašuvnna Davvi-norggas
– Inspirašuvdnagáldu han lea Davvi-norga ja árktalaš guovlu. Lea čuovgat ja seavdnjat. Geavahan olu referánssaid Sámi kultureanadagas, ja lean rievdadan dábálaš eanadaga vai šaddá viidát vásáhussan, dadjá son.
Son dadjá ahte lea olu bargan birra jándora, ja namuha ahte lea šaddan olu vázzit go lea leamašan olu meahcis.
– Muhto dál gal lea luopmu. Beasan bottu váldit ja bargagoahtit ođđa fámuiguin, dadjá son.
Galgá Amerihkkái
– Vuiten orruma New Yorkas, nu ahte juste dál lean bargamin dan guvlui guvttiin prošeavttain, ja muđui leat báikkálaš prošeavttat maid, dadjá son.
Earret eará čájehuvvojit buktagat sihke Riddu Riđus, Nordic Lights festiválas Vestlánddas ja Yorkas Englánddas.
– Lean ožžon olu buori dohkkeheami maŋimuš áiggi, nu ahte dat lea leamašan hui somá, muhto hirpmástuhtti seammás. Hui somá oaidnit ahte mus lea dat mii adno ráhkadit juoidá mii oažžu bálkkašumi, nu ahte lea somás vásáhus, dadjá Rognli