Dál rahpasa fas máilbmi
GLR Live lea áiddo báliid lágiduvvon. Riddu Riđđu lea boahtte festivála. Dan maŋŋel lea vel sihke Gaskaija Rock, Márkomeannu, spábbačiekčandoalut ja nu ain. Máilbmi rahpasa veahážiid mielde, maiddái Sámis.
GLR Live festiválas oinniimet govaid movttegis olbmuin geat dánso ja návddašedje musihka, fierttu ja beaivvádaga. Guokte jagi áigi eai livčče dát govat nu darvánan muitui go Sámi geassi lea festiválaid áigi. Dán jagi lea juohke modji juohke govas bures darvánan muitui. Festivála áigi ja movttegis dánsejeaddjit ii leat šat leamaš dábálaš dáhpáhus dan dan rájes go korona pandemiija giddii olles Norgga, olles máilmmi.
Min árgabeaivvedoaimmat nugo bargui vuolgit, čoahkkimii vuolgit, skuvlii vuolgit ja mánáidgárdái vuolgit, lea leamaš beannot jagi juo dakkár dáhpáhus maid ferte meroštallat duos dás. Min astoáiggedoaimmat nugo vuojadit, čiekčat spáppa, gávppašit, boradit olgun, vuolgit pubbii ja mátkkoštit leat maid leamaš doaimmat maid ferte árvvoštallat galgá go dahkat. Muhtimin dán leat leamaš gildojuvvon ge.
Astoáiggedoaimmat ja árgabeaivvehommát lea dego dearvvašvuohtage. Don dego vuorddát bissut dearvvašin ja go de buohcagoađát ja jus duođalaččat buohccát, de dávjá easkka fuomášat makkár árvu dearvvašvuođas lea.
Ja dál rahpasa servodat veahážiid mielde ja mii beassat nugo festiválaide fas, vaikko vel doppe ge leat gáržžidusat festiválaguosselogu ektui, dat agálaš mehter man galgá muitit doallat gaskka ja ahte fertet háhkan ruonápássa boahkkuma dahje iskosa bokte.
Astoáiggedoaimmat ja árgabeaivvehommát leat dego dearvvašvuohtage. Don dego vuorddát bissut dearvvašin ja go de buohcagoađát ja jus duođalaččat buohccát, de dávjá easkka fuomášat makkár árvu dearvvašvuođas lea. Dál go leat hehttejuvvon eallit dábálaččat, de oaidnit maid várra eambbo árvvu kafeas deaivvadit, vuoktačuohppi luhtte finadit ja man somá lea fas vuolgit hárjehallanbáikkiide ja nugo dál, festiválaide. Mii galgat leat giitevaččat nu guhká go leat dearvasat ja nu guhká go mis lea normála árgabeaivi.
Mii illudit dál festiválaide ja luomustallatge. Dattege lea dehálaš muitit ahte pandemiija ii leat vel nohkan. Duos dás boahtá diehtu daid iešguđetge báikkiin dáppe davvin ahte korona lea njommon ja leavvá fas. Norggas, Suomas ja Ruoŧas lea ain njoammun. Máŋgga sajiin máilmmis lea ain roassu ja olusat ain jápmet.
Lea ain dehálaš bassat gieđaid, doalahit mehtera gaskka eará olbmuide ja geavahit njálbmesuoji gos lea olu olmmoš. Mii fertet ain leat várrogasat amas árgabeaivi ja astoáigi ii vuot oalát reavččaga.