Ná riibá mielki guhkká geassebáhkain

Mielki mii vurkejuvvo rievttes vuogi mielde riibá guhkit go buoremus ovdalmeari ráva, mii lea merkejuvvon «buoremus ovdal»-beaivin. Dá moadde rávvaga mo seailluhit mielkki amas ii jieso mielkepáhkas geassebáhkain.

Menddo olu norgalaččat eai fuola šat mielkki go «buoremus ovdal» beaivi lea vássán. Iskan maid Norstat čađahii 2015:s čájehii ahte birrasii miljonbeale norgalačča diškejedje mielkki go riibanmearka dievai. Čájehuvvo ahte norgalaččat bálkestit eanemusat mielke- ja meieriijabuktagiid, ja váldosivvan dása lea «buoremus ovdal» beaivvi dievvan. Olusat diškejit mielkki ovdal dán beaivvi sihkkarvuođa dihtii. «Buoremus ovdal» beaivvi lea dušše ráva man guhkká buvttadeaddji sáhttá dáhkidit ahte kvalitehta lea buorre jus dat lea vurkejuvvon rivttes láhkai, čállá Opplysningskontoret for Meieriprodukter direktevra Ida Berg Hauge preassadieđáhusas.

• Eanaš mielki Norggas liggejuvvo 15 sekundda 72 °C grádas, maid gohčodit vuollegašpasteuriseren.

• Mielkki «buoremus ovdal»-beaivi biddjo 13 beaivái maŋŋelii go meieriija lea leiken mielkki mielkepáhkaid sisa.

• Mielki mii lea pasteuriserejuvvon alit temperatuvrras (ultrapasteuriseren/uht) sáhttá seailut gitta guđa mánu maŋŋelii go lea leikejuvvon mielkepáhkaide. Nugo skuvlamielki ja laktosekeahtes mielki, yoghurta, lohppejuvvon mielki.

• Mielkki berre seailluhit 0–4 °C grádas galmmihanskáhpe vuolemus hilddus gos lea galbaseamos. Ále vurke mielkki galmmihanskáhpeuvssas.

• Mielki ii gierdda beaivvečuovgga.

• Govčča borramuša mas lea garra hadja go dát hadja sáhttá rievdadit mielkki smáhka.

• Mielkki sáhttá maid galmmihit jiekŋabovssas. Geavat dan dalle dáiggis dahje sullasaš atnui lagamus guđa manus.

Diehtu

Ále hilggo mielkki nu guhkká go hádja ja smáhka lea buorre ja go mielkkis lea buorre ivdni. Preassagovva: Melk.no